Carrie戰黑魔黃妖 - 左丁山
We撐林鄭fb圖片
每逢大節長假期將至，皇后大道中唔知點解，特別多人，特別多車，馬路塞車，街道就塞人。年卅，在砵典乍街等過馬路，紅燈久久不轉綠燈，行人就越來越多，香港人係好守法嘅，一於慢慢等，好有耐性，令左丁山諗起曾俊華辭職等待北京開綠燈一事，莊曾話自己好守規矩，大部份香港人都係咁嘅啦，除非有人受特別照顧，呵護備至，反佢即係反中央咁巴辣嘅啫。
等等吓，手機響起，知道有WhatsApp訊息，情不自禁咁拎手機出嚟，原來係一位年輕記者從fb傳過嚟嘅一個童話故事Carrie前傳，正想睇埋內容，綠燈已着，後面有人細聲嗌：「左生睇路唔好睇手機呀」，於是急忙走過去對面，去到Zara先至轉頭一望，後面竟然係高官甲。高官甲呢日唔知點解着便服變成路人甲，打過招呼之後，左丁山問佢對Carrie有何睇法，佢竟然話：「60歲仲講Carrie小朋友？Give me a break。我睇到英國BBC及每日郵報將Carrie嘅冇廁紙事件列為國際笑談類，好唔舒服，成件事拉低晒香港人形象，唔識搭地鐵，唔識買廁紙嘅人做我地特首，香港無人乎！不過我最唔舒服嘅就係Carrie好似少不更事咁講咗一句：我依家做番人！大姐呀，官唔係人咩，我地班AO、EO唔係人？佢起碼應該講：我做番市民，做番普通人吖。」嘩，如此批評舊上司，高官甲都幾夠膽，從中亦可知林太未必可以令公務員心服口服，呢方面據講葉太比較受到下屬擁護嘅，不過世態炎涼，葉太唔受中聯辦寵愛，怨憤都無用。
高官甲走後，左丁山行埋一邊，再睇手機嘅Carrie童話故事，原來fb有一個We撐林鄭fb專頁，有一個「林鄭童話之Carrie前傳」，講一個名叫Carrie的小朋友，長大成人，有愛心，不驚強權，決定放棄安逸退休的日子決心守護小島，誰知犯上肥黑魔王的禁忌，奸火中燒下命令所有黃妖鬼怪出來，係要咬死Carrie，這個小島居民願不願意挺身而出，和Carrie一起守護這小島，不容黑魔黃妖佔領奪走大家這個美好小島的家。好快睇完，幾乎笑到爆肚，Carrie大戰黑魔黃妖？邊個係黑魔黃妖呀？姓曾，姓葉劉還是姓胡？Carrie已受董梁張萬般關愛，又話攞唔到建制派提名嘅人要反思，既然勝券在握，佢啲粉絲仲要製造敵人，罵對手為妖魔？用如此手法寫童話呃like，又係一個國際笑話。
上一則: 世界越亂越好 - 陶傑
下一則: 佛都有火 - 林夕
Z88
没有评论:
发表评论