隔牆有耳：葛博士斥用詞唔恰當 雷鼎鳴：叫雞係廣東話一部份 - 李八方
由梁粉骨幹組成嘅香港發展論壇前日舉行研討會，梁振英同陳啟宗等講者金句盡出，幕幕高潮，至爆嘅當然係科大經濟系前系主任及榮休教授雷鼎鳴，佢談及內地科技進步時舉例話「叫雞」都可以用手機畀錢，聽到唔少人O晒嘴，在場嘅民建聯立法會議員葛珮帆都話用詞唔多恰當，惹火尤物雷鼎鳴噚日堅稱「講得好啱、用字都好準確」，反指葛博士思想太古肅！
雷鼎鳴噚日喺商台回應「叫雞」一詞惹來爭議時指，「叫雞」呢個詞喺香港都深入民間，有啲電影都以此為戲名，「變成廣東話一部份」，冇正面或負面含義，而經濟學家研究社會問題時，最鍾意將社會上邊緣人嘅行為包括在內，而佢亦同時話喺街上畀錢乞兒都一樣可以用支付寶，唔覺得有冒犯。
咁用詞可唔可以典雅啲？雷鼎鳴明言對呢種觀點好反感，指美國校園近年出現一種「安全空間」，即校園用嘅字眼唔可以觸及某啲人嘅禁忌，而芝加哥大學校長曾經聯同其他學校校長發聲明，認為大學唔應該有安全空間，「講乜都無所謂，但當然要有底線，例如唔可以攻擊或傷害其他人」，直言素來主張思想自由，指言論自由不應設「無聊限制」，但必須要有底線。
指葛博士太古肅
至於葛博士叫佢以後唔好用呢啲字眼，佢話對方「思想太過古肅」，但都補充一句，對方可能喺席間「焗住」要畀個回應傳媒喎！不過呢，葛博士對雷鼎鳴嘅批評相當氣憤，佢向傳媒強調，將性工作者形容為動物，明顯係有侮辱成份同貶義。
李八方
...................
没有评论:
发表评论