香港政改表決鬧出一個國際笑話，不少建制派議員在傳媒面前捶胸頓足淚灑人前，見之令人動容，幾乎噴飯。
然後你就會發現一個問題。有建制派議員出現在中聯辦被記者發現，記者問是否去跟中聯辦交代，那人答說中聯辦沒有責怪。淚灑人前的議員說一夜驚醒幾次，想到這次投票令中央失望了，心裏特別難過。也有投了票的建制派議員說收到中聯辦電話表揚，「肯定了我的工作」。
凡此種種，不是中聯辦就是中央，可見這幫所謂的香港議員，拿着香港公幣，做着「香港民意代表」，心裏卻只有太上皇，早就把一國兩制拋到九霄雲外。不然的話，政改方案通不過，不想香港民主進程受阻，五百萬香港選民失去權利，反倒只擔心「中央失望」。因愚蠢而出事，跑進中聯辦，誠惶誠恐，結果中聯辦沒有怪罪，馬上如釋重負。即使沒做錯事那個，因為中聯辦來電表揚，還「肯定了工作」，便沾沾自喜。這種「香港議員」到底知不知道在為誰服務，誰才是出糧的老闆？
所以，香港有什麼三長兩短真的不能怪中央，真正破壞「一國兩制」的人全在香港，把兩制拼命搞成一制的就是這些人。如果我是中央，我何止失望，簡直頭痛：到底應該怎麼應酬這班破壞「一國兩制」的積極份子！
自5月5日本欄寫及「本欄倒數」，指本欄於6月30日告別讀者之後，引起嘅迴響與讀者反應，令左丁山意想不到，首先係收到大批讀者電郵、來函，一係要求「GG細語」寫落去，二係想知道如果左丁山到其他報紙續寫，會去邊一張，等佢地跟隨。然後在馬場廁所、馬會廂房、陸羽茶室以至上海總會都俾相識或者陌生人追問6月30日之後去邊度寫。某日早晨在史丹利街更俾某一位陌生人拍膊頭問：「你去邊度寫呀，我想知。」至此方知蘋果讀者散佈各階層，上至達官貴人，下至基層普通市民；大學教授、賓架、的士司機、酒店侍應皆係本欄讀者。
消息傳開後，五份報紙嘅主編老友都打電話嚟邀請過檔，一位仲即刻送埋合約嚟，得佢地睇得起，真係多謝晒，正仔細考慮何去何從之際，肥佬黎打電話嚟請食飯，食完又打電話嚟講哦文，竟然講到話大家自小便相識，在自由道太平道交界籃球賽場碰過頭……嘩，自由道太平道交界之地面籃球場，係五十年前之事，乜肥佬黎仲記得呀！講到咁情長，又要左丁山體諒蘋果日報兩位兄弟（即堅哥與徐緣）嘅苦衷，乃念蘋果日報之經營艱難，被人抽廣告等等壓力……總之萬事有佢，唔好走，要繼續寫落去……
嘩，講到咁，仲有乜好意思話唔制，唯有舉手向肥佬黎投降，本欄繼續寫，只要黎生繼續撐嘅話！
呢兩個星期，因時間逐漸逼近6月30日，更多人見面問、打電話問左丁山走去邊。依家公佈咗，請大家唔駛再郵電交馳嘞，對各方面嘅讀者、朋友，及邀請左丁山過檔嘅老友，謹此再三拜謝，如你地對上頭交唔到差，請叫老闆打電話嚟鬧幾句。還有，在眾多讀者來函挽留／抗議唔寫之中，亦有兩三封大駡左丁山係地產霸權代言人，早走早着嘅。左丁山讀經濟出身，自讀書時代起，就反對馬克思經濟，傾向自由市場，受海耶克「到奴役之路」影響，後來又受佛利民學說影響，反對政府干預，此立場係眾所周知，如因為咁而以為左丁山在本欄代表地產霸權，都幾荒謬。不過咁，早排有學生去城規會發言，一開聲就話自己係馬克思主義者，鬧城規會不公義，這種學生思想赤化之風，係令人憂慮嘅。
