何俊仁做特首？
2012年02月21日
出席泰國副總理兼財長 Kittiratt嘅午餐會，同席有兩三位馬來西亞華人，皆金融機構高層，一位問左丁山：「做乜你地特首選舉搞到咁搏命，雙方打到牙血都出埋咯喎？」左丁山笑曰：「有選舉就是如此，馬來西亞安華（ Anwar）點解久唔久就被政府檢控雞姦年青男士？」對方亦大笑，盡在不言中。
練乙錚批特首選舉係「假選舉動真格」，乃是的論，下一屆話有特首普選，雖然辦法未知，但屆時一定打到眼火爆，口口聲聲講君子之爭者，呃吓儍仔儍女而已。美國總統競選，歷屆皆有火藥味，競選人不斷互轟，今年金里奇俾 CNN挖三十年前離婚臭史，在辯論之上狠狠教訓 CNN資深記者 John King，隨後羅姆尼不斷用廣告攻擊金里奇私人言行，金里奇大怒，叫羅姆尼「君子」一啲，羅姆尼回敬話：「初選我試吓你啫噃，咁都忍唔到，如果你真的成為共和黨候選人，點樣抵受奧巴馬嘅十億元（美元）廣告大攻擊呀？」金里奇唔夠錢，唔夠人，難以反攻，現在已失晒氣勢，輸梗咯。
唐梁之爭到目前為止，負面新聞各有三宗，可講係三比三打和，唐生有「感情缺失」、「買紅酒」、「僭建」三宗；梁則有「戴德梁行一鋪清袋」、「華懋如心廣場」、「西九填海概念設計比賽利益衝突」，你話邊一單係嚴重啲，就各為其主嘞，講乜都得，家到三月二十五日還有三十三日，仲有乜嘢事會發生，難以估計，如許冠文最近話齋，現實新聞比佢憑想像寫出嚟嘅劇本更奇異，件件新鮮兼奇峯突出，點估呀。
最詭異嘅選舉變化就係何俊仁當上特首之機會忽然大增──又或者選委會選唔出一人當特首嘅機會亦好大。三人之中，何俊仁已成為參選人，其餘兩人本來遙遙領先，但如果兩人一齊墮馬呢？何俊仁成為唯一候選人又會點？工聯會/民建聯不如急急叫譚耀宗或陳婉嫻報名參選，保送是但一位入閘嚟擋住何俊仁？商界又會唔會搵個另一位代表？如果真的出現如此場面，不知如何結局。
（左丁山）
没有评论:
发表评论