【講呢啲萬歲】劉江老師成網絡紅人
全因「講呢啲....」最後更新: 1217 21:33 / 建立時間: 1217 16:47
綠葉王劉江老師，獲傑出演員大獎，網上又再瘋傳「講呢啲...」
一講劉江老師，真係唔可以唔「講呢啲」﹗噚晚喺電視頒獎禮，成晚高潮並唔係落喺視帝黃子華及視后田蕊妮身上，亦唔係張智霖﹑鍾嘉欣及徐子珊，反而焦點落喺拎「傑出演員大獎」嘅綠葉王──劉江﹗當旁白簡介劉江有幾威水時，都有提及：「...堅持﹑專業﹑認真，一講劉江，唔可以唔『講呢啲』﹗」
劉江老師成為網絡大紅人，全因一張劇集截圖喺網上瘋傳，相中劉江瞇起眼咧嘴而笑，而字幕就出現：「X﹗講呢啲﹗」字句，自此呢句潮語成為網絡用語，唔少網民留言時，索性Cap呢張圖作回應。
當然劇集原本對白唔係呢句啦，只不過劉江老師演繹得實在太精彩，被網民改為：「X﹗講呢啲﹗」，更顯傳神。而噚晚劉江老師獲獎後，大批「講呢啲」信眾，即時喺網上洗版式cap圖恭喜佢攞獎，有網民留言：「大家最期待佢『講呢啲』！」﹑「大家等咗好耐！劉江攞獎有得睇啦！」﹑「佢絕對係良心說話！大家一齊聽下『講呢啲』啦！」
而劉江獲獎時亦語重心長咁話：「呢個獎對我哋一班年長藝員，喺公司默默耕耘嘅認同，所以希望公司珍惜自己擁有年長前輩，好似羅蘭姐﹑夏萍姐，佢哋70幾﹑80幾（歲），希望公司喺工作上多多從健康角度安排，等大家去愛護佢哋。因為冇咗黑暗，星星呈現唔到佢燦爛光芒。願神祝福大家。」
講呢啲...講得好﹗
比我抖下得唔得？ 
劉江老師語重心長，希望公司可以珍惜年長前輩。 
一講劉江，唔可以唔講呢啲﹗ 
「傑出講呢啲大獎」…… 
劉江+江華等如劉江華，記得嗎？ 
没有评论:
发表评论