0.1秒定格 狗仔一跳變3D
傳統3D打印由工業、醫學等領域，逐漸轉戰民用，甚至開始入屋，然而質素如何精美，還是多以掃描「死物」為主。從事古蹟保育工作的吳逸釗（Patrick Ng），就利用自行研發的3D攝影系統，將平均要12秒才能完成的功夫，縮短至0.1秒極速完成，堪稱全球最快！原理看似簡單：23部相機再加4支閃燈，當日瞬間凝住狗仔Gogo跳起的0.1秒，製成3D模型，激似！
記者：陳國輝
攝影：楊錦文
吳逸釗Patrick Ng
1997年畢業於中大建築系碩士，曾於建築師樓工作兩年，後來利用自行研發的3D攝影系統，參與多項古蹟保育工作，包括灣仔藍屋及前立法會大樓等，幫助翻新及活化工作。
要把實物製成3D模型，不論物件體積大細，普遍採用3D scanner。不過讀建築出身的Patrick，認為用於民間3D打印技術，仍有很多缺陷。「最大問題是傳統3D掃描時間太長，至少十幾秒，全身掃描甚至要花上十多分鐘！」想將活潑好動的寵物及BB製成3D模型，傳統方法基本冇乜可能。但透過3D攝影系統，便能利用拍照原理，僅以0.1秒即可把物件瞬間定格，「器材相對簡單得多，最重要的是可以縮短時間，又能獲得足夠的3D數據。」
23部相機同步圍拍
未踏入由Patrick一手搭建的3D Studio，還以為是很hi-tech、擺滿昂貴設備的空間，點知入到去感覺卻有點影樓feel！眼前所見，器材包括23部相機、6支固定腳架及4盞射向天花的閃光燈，如果你以為只是一般影樓佈局，亦大錯特錯。「細心留意，每支腳架的上、中、下位置都裝有相機，物件則會在正中央，務求影到每個角度。」此外，為了如實捕捉面上表情，還原神髓，對準頭部的的相機數量相對較多、排列亦會較密。
或者你會疑問：「點解拍攝用嘅相機，全部係Panasonic G系？」Patrick解釋，其實他已經測試過很多牌子，比較之下，發現如果用23部相機同步拍攝，G系的時間誤差最少，表現最理想！他沒有選用專業的單反相機亦有特別原因，「試想，單反相機嘅淺景深效果實在太勁，後期製作會相當困難；反之，G系能夠影到近乎全sharp嘅照片，合併嚟做3D模型就會容易得多。」
■3D Studio內有23部相機、6支固定腳架及4盞射向天花的閃光燈。
■成品以售價約100萬元的3D打印機製作。
■傳統3D掃描會因捕捉數據不足，導致部份陰影位無法還原，出現爛相情況。
3D打印BB寵物
講完器材，咁到底係點影嘅呢？「好簡單，只要一㩒無線shutter就搞掂。」講得輕鬆，其實事前工夫都幾繁複，Patrick會先調校好相機的焦距、光圈，確保能夠準確捕捉到中間的物件，直至23部相機都設定為同一數值，才可按下快門拍攝。
成日坐唔定嘅寵物同小朋友，以前好難叫佢哋長時間靜落嚟俾你慢慢掃描。但來到3D Studio，只要無超出鏡頭範圍，就算幾大動作，都能瞬間定格，打印出傳神的3D模型。Patrick研發的3D攝影系統，除了能夠應付上述情況，亦可製作出兩人或以上的3D模型，比只能製作單一物件的傳統技術，更加多元化。「這裏的局限性較低，相機角度可以自行調校，故能容納更多被攝對象；例如一家幾口坐埋一齊，甚至情侶正在接吻的溫馨場面等都搞得掂。」
■採訪當日，特別找來好動狗仔Gogo現場實測3D攝影系統，成功將牠的可愛神態製成立體模型。（1:10全身3D模型每個$2,400起）
■情侶的親密舉動都能製成3D模型，不似傳統方式般死板。
■就算幾活潑的小朋友，都能準確捕捉。Patrick又會在模型底部加上磁石，幫助企穩。
拍攝流程
當日Patrick為狗仔Gogo拍攝一輯3D相，由調校鏡頭、㩒掣，到揀相，全程約花30分鐘，至於打印3D製成品，則要用上三日時間。
１.先為相機調校合適角度。
2.對焦，設定光圈數值。
3.拍攝只需0.1秒，然後於電腦揀出滿意的照片。
4.利用電腦軟件合成3D影像，再由3D打印機打印。
小貼士：咪戴眼鏡！
用相機製作3D模型，過程睇落簡單，但Patrick提醒各位最好避免穿着反光衣物。「在合成影像的過程中，如果拍攝到一啲半透明或反光嘅物料，電腦程式未必會計算埋，結果就會令3D模型同實物有出入。」他又建議，戴眼鏡的朋友不妨除低先影，如此效果就最接近現實！
MeMoment
中環雲咸街31號東耀商業大廈5樓
即場拍！哈囉喂3D頭像
現時製作一個1：8的全身3D人像模型，索價數千，然而，為了配合月尾的萬聖節，荃灣愉景新城就舉辦了一個名為「HallowKids Expo」的活動，只需$560及3日時間即可製作一個1：8的3D頭像。如果你是該商場的會員，優惠價更低至$480。化個鬼裝，影張鬼相，再製作成3D模型，夠晒應節又盞鬼！
HallowKids Expo
日期：10月24日至11月2日
時間：中午12時至晚上9時（周一至五）/早上11時至晚上9時（周六及日）
地點：荃灣愉景新城
没有评论:
发表评论