阿爺政經算盤
股市熱炒之事，在大榮華飯局上引起熱烈討論。資深基金經理K被眾人爭相詢問，佢話：「我係舊一派，以過往經驗睇，熱潮可以維持個多月。既然北水南來推高市道，本港及國際基金如果坐響度靜觀其變，唔入市嘅話，必定跑輸大市，難向投資者交代，故此無法子唔落場陪玩，爭購港交所、中人壽、騰訊呢類指數股，以免執輸，但任你買，一個月之內已經買夠買齊，現金儲備用得八八九九咯，股市就要靜落嚟回氣啦。所謂this time is different之說，以前見過太多咯，不可盡信。」
但分析L有另一番見解，由左丁山再詮釋。佢最近對中港政治開始研究埋，認為呢次係「政治經濟學」political economy之21世紀演繹，並非單純炒股咁簡單。習李上台後，習以強勢風格，利用打貪清理門戶，絕不手軟，又講中國夢，推動一帶一路，牽頭建立亞洲基礎設施投資銀行（AIIB），野心甚大，顯然就係要憑藉中國經濟增長（保7%）之勢，十幾年內GDP追上美國，奠立世界金融經濟領袖地位，與美國並駕齊驅，平起平坐。建立AIIB，最初受美國阻攔，但中國睇準歐盟（特別係英國）貪錢，睇錢份上嘅心理，講明會注資五百億美元落AIIB，佔註冊資本一半，即係中國肯孭重飛做蝕本生意，英國以為執到便宜，不理美國反對，聲明參加，於是西歐盟友立即跟風，令美國孤立無聲，馬仔日本據知會於四月份內宣佈加入AIIB，於是中國大勝。
但要做金融大國，必須有一個世界金融中心城市，股票及資本市場發達健全，市值龐大嘅地方。在中國而言，唔係上海就係香港啦。內地官媒講到以股市拉動經濟實體，好可能就係藉着各國量寬放水時機，中國人民銀行靜靜雞放埋一份，谷旺股市，谷大市值，例如港交所已成為全球市值最大之交易所，大有資格以股換股方式收購美國交易所（政治問題另議），令港交所稱霸全球。AIIB將來亦可利用香港集資，令日本人話事之亞洲開發銀行成為阿二……如此演繹，有好大想像空間，故此分析L話音樂椅不會短期停頓！
（按：新亞書院舊址，荔枝角道、桂林街、醫局街重建項目之桂林街公眾休憩空間，今日下午三時舉行竣工儀式，由市建局主席蘇慶和及新亞校董會主席梁英偉主持，各校友如有空，請到場參觀此紀念新亞書院之深水埗文化地標。）
I
没有评论:
发表评论