旅遊陷阱 - 左丁山
前幾日講起菲律賓，資深旅遊界人士T因其他事與左丁山開會後，一齊去快餐店飲杯茶，佢問左丁山：「你有幾耐冇去過菲律賓呀？上一次係幾時？」幾乎考起，努力回憶下，卒之諗番1987年真正去過，住宿霧香格里拉，跟住去馬尼拉，住在賓架R嘅Forbes Village大宅，跟賓架R去食晚飯，司機放支自動步槍在行李箱，現在諗起都覺得恐怖。之後呢，啊，喺1995年去過馬尼拉公幹過兩三次，當時係一間馬尼拉上市酒店嘅總裁，去開董事會及管理會議，每次下午三時就暫停，因為市區輪流停電，三點鐘就輪到我地酒店停電一個鐘頭。95年之後，未曾去過咯。
旅遊T話：「你完全冇損失。去年有人邀請我去菲律賓視察，睇吓可唔可以搞高檔旅行團。視察完就唔想返轉頭，馬尼拉交通擠塞不堪，簡直係死症，通往其他風景區又冇高速公路，旅遊巴寸步難行，何況衞生環境差，要我帶香港人去旅遊，自己都於心不安。」
打蛇隨棍上，問旅遊T有乜好去處，佢話最鍾意法國南部與意大利佛羅倫斯附近嘅小鎮，遊山玩水別有趣味，而且比較安全，到巴黎羅馬反而隨時俾盜賊老rob，防不勝防，即使名女人Kim Kardashian最近咪一樣被匪徒用槍指住嚟搶！旅遊T話：「法國賊好難分，有白人、有黑人、有中東人，我地無從分辨，只能小心刻意低調，千祈唔好揚到俾賊吼實。曾有某地富翁身穿名貴時裝，坐頭等，到巴黎機場就有一級豪華酒店司機揸limousine迎接，架車到巴黎市區就塞車，突然就有賊人從路邊撲出，用鐵鎚扑爛玻璃夾硬搶富翁荷包及手提行李，之後逃去無蹤，分明係在機場已有賊贒實，跟蹤、搵同黨在必經必塞車之路埋伏接應啦。大陸人旅行團多數住在一啲招呼團客嘅酒店及在酒店附近餐廳吃飯，每間都被賊人踩線贒實，伺機搶劫。我地住在巴黎半島酒店附近就冇咁雜，少啲賊嘞。」唔，一分錢一分貨啫，但難保自半島酒店走出嚟行街，就會被賊人跟住呢！旅遊T話優閒嘆世界不如參加歐洲River Cruise，二三百人一隻船，唔知幾爽，趁強國人未玩到遊船河之時就好去嘞。聽到左丁山非常神往，恨不得立即向旅遊T嘅公司訂位，可惜太多俗務纏身，行唔郁呢。
上一則: 這兩個字不便宜 - 陶傑
下一則: 性格決定命運 - 林夕
Z88
没有评论:
发表评论