司長暗戰 - 左丁山
梁振英在上星期五下午五時半見記者，宣佈推出物業印花稅辣招，劃一為15%，如非首次置業人士（或以前買過樓又賣出去，現時變成無樓人士），買樓交稅交到面青，中產階級買一千萬樓，交稅百五萬，簡直殺死人，故此新辣招宣佈後，二手市場一片死寂，星期一嘅股市上升158點，但地產股逆市下跌，不親梁之長實地產（1113）跌8.8%，為梁振英撐台之深梁新世界發展（0017）跌9%，著名梁粉陳啟宗之恆隆集團（0010）跌2.8%，恆隆地產跌2.3%；恆基地產（0012）跌5.8%，新鴻基地產（0016）跌9.9%，啲地產大亨多得梁特首唔少。
大幅度調升物業印花稅，當然會影響地價，如果下次招標買地，竟然又創新高，而中標公司又係內地房產公司嘅話，大家就知道其中有景轟。宣佈新稅項，本是財政司司長之事，但上星期五嘅記招由梁特做主導，張炳良、陳茂波做配角，堂堂財政司司長曾俊華要搶咪先至講到五分鐘，不甘坐響度做茄喱啡；但佢講完之後，低頭不語嘅表情，就係讓全港市民知道，佢與波士完全「冇乜兩句」，費事瞅睬。
競選特首之背後暗鬥，已明白顯示在大眾眼前，曾俊華遲遲不宣佈競選，好似已令到支持佢嘅商界財金界開始不耐煩，香港01爆料話金管局總裁陳德霖會參選，已迅速遭受否認，但中環消息界人士又傳出，陳德霖係曾俊華班底，如林鄭月娥曾經講過，2017年競選特首之人，應有一個班底吖嘛。假如曾俊華競選成功的話，陳德霖會係財政司長，翟紹唐會係律政司長喎，信不信由你。但假如中央不批准林鄭與曾俊華同時參選嘅話，怎麼辦，到時陳德霖會唔會捱義氣挺身而出呢？
林鄭背後已經發功，上星期有近40人出席新聞行政人員協會（NEA）晚宴，全是傳媒高層，請林鄭閉門發言，規矩係off the record，點知高官一講嘢就無秘密可言，話唔講都寫埋，香港01率先爆料。左丁山見到，又去問幾句，得知林鄭對莊曾不點名批評，指扶貧委員會努力都冇用，有人係唔肯開水喉，又唔肯做嘢，與葉劉話莊曾hea足十年，有異曲同工之妙。咁樣講，如莊曾得逞，林鄭大有可能與丈夫去英國隱居，但心情未必係悠然見南山嗰種，而係氣屈難伸嗰隻！所以仍有可能不如自己赤膊上陣，同梁特肉搏。支持開梁特嘅地產商人吃完大虧，已對梁特感冒，開始考慮轉為支持林鄭成為香港第一位女特首嘞。
上一則: 我其實是左派 - 陶傑
下一則: 老婆不在家的日子 - 曾志豪
Z88
没有评论:
发表评论