【李安新片】《比利．林恩的中場戰事》高清睇美式假大空
該怎樣形容美國？
假。
大。
空。
癲。
戇X。
伊拉克戰爭的殘酷，似乎不及美國的虛假恐怖。每秒120格4K拍攝超逼真技術符合故事設定，對人性極致放大。
軍人被逼配合商家，根本沒甚麼尊嚴。
飾演Billy Lynn的 Joe Alwyn是影圈新鮮人，演出超自然。身為英國人，竟然又chok到美式口音，有啲料到。
Kristen Stewart扮演主角家姐，兩人戲中應該很親近，但講真我覺得有點疏離感。
看罷李安新作《比利．林恩的中場戰事》，呢堆感覺係湧住來的，好強烈。
戰場，爆炸，槍殺，陣亡，大部分活於和平的人讀到、聽到這些字眼，都不痛不癢，因為子彈唔打到肉唔知痛。對前線軍人，卻是堅過石堅的真實生活，分分秒秒戰戰兢兢。
電影用上每秒120格4K拍攝技術，實景 3D 攝影，希望觀眾親歷其景。睇過就知以往看的3D電影大多有辱3D之名。真正的戰爭場面不多，以埋身肉搏一幕點睛。電影聚焦的是軍人如何被國家上下消費，政府借軍人「英勇行為」繼續堂而皇之出兵、商家想炒作美國夢攞着數、平民只想有英雄可以J下，有冇人真正想理解軍人在戰場的感受？冇乜。
鏡頭特寫主角Billy Lynn（比利．林恩），極致清晰、異常立體的視效，我覺得係李安借鏡頭表達對士兵的關懷，或者close up係多咗啲，或者燈光唔係好靚，但係投入感真係直逼10,000，主角眼中條紅筋都交緊戲，你真係會被主角情緒拉住走；人性的暗黑位放大到你無辦法唔理。
現實：美式足球賽狂歡暢飲低胸啦啦隊跳跳跳歌星唱唱唱煙花爆爆爆
腦海：伊拉克戰爭槍林彈雨長袍敢死隊射射射敵軍殺殺殺炸彈爆爆爆
兩段交錯，對比大到令人覺得美國嗰種享樂至上，粉飾太平係幾咁嘔心。電影原著小說作者Ben Fountain正正因為2004年電視上播放感恩節球賽那個九唔搭八中場騷而寫下故事。表演充滿愛國主義、情色意味、無內涵pop music，場中除了美國國旗與爆乳囡囡，還是美國國旗與爆乳囡囡。然後球場上站滿軍人，一個啱啱征戰完返國的軍人被放置在呢個人工到爆的偽繽紛場景，係咪會癲？
片中一班軍人剛失去了一個上級，其中Billy Lynn因不顧安危衝出去救人而被棒成英雄，可是英雄也不過是Destiny 's Child的表演時的佈景板，「廁所位」中場騷的點綴。軍人上陣的壓力，都被煙花壓下；失去同袍的哀痛，都被歡呼聲掩蓋。
如果軍人上陣是為了保家衛國，家國人民卻對你如取如攜，你都會諗佢哋係咪值得你去保護吧？19歲的Billy Lynn幾日間見盡世態淡涼，成人禮總是青春殘酷物語。唯一care佢生死的只有佢家姐，重回戰場與否，to be or not to be？做逃兵，一下子由英雄變廢青，又有邊個承受得起？女女點解肯埋身？都係因為你有英雄光環。逼不得已x無可奈何，入過戰場，根本唔到你揀，再回頭已百年身。
有人話呢套戲反戰意識唔夠高，我反而覺得導演唔想直筆甩反戰，而係掟個彎用士兵的壓抑，假大空又戇X的中場騷，立體展示戰爭的兩面，見微知著。我永遠記得片中伊拉克小朋友空洞卻帶着仇恨的眼神。
《比利．林恩的中場戰事》(Billy Lynn's Long Halftime Walk)
導演：李安
演員：Joe Alwyn、Kristen Stewart、Vin Diesel、李淳
現已上映
85分
記者：葉青霞
上一則: 【轉季喇】街頭票選女生冬季校服 最靚最多人揀係邊款？
下一則: 欺善怕惡 - 陶傑
Z88
没有评论:
发表评论