入廚學藝 - 左丁山
電視截圖
聖誕新年假期飲食太多，美酒佳餚連續數日，口腹之慾滿足晒，之不過，凡事必有代價，晚上睡覺前量一量血壓，就知道血壓比前一星期上升起碼百分之二十，為之一驚，但第二朝醒來，又試食過。
大除夕夜，全家例牌在家聚餐，老早在馬會訂咗火雞、火腿（肯定係性價比最高嘅正斗聖誕新年食品），六舅還是晨早要到大埔街市搜羅靚料，呢個街市人氣旺盛，內裏不少攤檔有罕見靚海鮮及牛肉出售，一間凍肉店又有最靚嘅肉類。沙田大埔識食之人，無不到大埔街市，故此停車場必定爆滿，要好有心機在外等候。
六舅一行人在升降機內講起飲食之道，有一位師奶突然提及：「鼎爺好好功夫呀！」一呼百和，成部𨋢嘈晒，人人話鼎爺冇得頂，六舅啱啱在前一晚睇過節目，亦附和一句：「真係可以學到嘢。」一眾買餸師奶齊聲話：「睇過鼎爺，所有其他電視入廚節目可以摺埋啦，唔駛睇！」六舅認為呢個節目嘅收視率可能好高，無綫戲劇已如日薄西山，無端端殺出一個鼎爺，提升收視率，仍算有運行。
行銷A亦有睇鼎爺，但點教自己嘅菲傭學習呀？退而求其次，知道秘書V（左丁山講嘅）廚藝精湛，最近賦閒在家，於是多方要求之下，得秘書V應承，叫咗自己嘅菲傭A去秘書V屋企學師，首先學曉一味豉油雞，學到有秘書V六七分水準，已經令行銷A吃得非常高興。但長此以往，秘書V又唔係開班授徒，點可以長期義務教菲傭入廚呀？秘書V對廚藝訊息素來靈通，知道有名師開班，自己都心郁郁去報名，當係深造。呢個廚藝班由信興集團之「信興廚藝中心」主辦，請來陳家廚房之陳記臨、方曉嵐夫婦，黃梁淑英（家政講師），周志威（西廚，曾任職東京希爾頓，香港仔遊艇會），Sue-Anne（廚藝專業教師），Sandra（媒體廚師、食物造型師）任教，中西美食教埋，課程方面就配合今天香港家庭之廚房設備，精心設計，譬如電焗爐、高速煲、麵包機、IH電磁爐、蒸氣烤焗微波爐等等，設計不同中西菜式適合家庭午餐晚飯、派對需要。香港有不少「模範」（冇飯）家庭，主婦唔識煮飯，學呢啲科技入廚最啱，即使高手如秘書V之流，亦可參考各種新廚房設備嘅菜譜呢。課程以中英文授課，非只主婦，淑女、男士可以參加，行銷A話，想叫菲傭A去上堂，當然亦OK，1月9號就開課，當日會教導炮製髮菜蠔豉南乳豬手煲，生炒糯米飯，迎接雞年呀！
上一則: 國寶喧騰劇 - 陶傑
下一則: 她們不能是港女 - 曾志豪
I
没有评论:
发表评论