輪流做莊方穩定 - 左丁山
股市在二月五日嗰個星期大跌，眨吓眼到二月底股市又再回升，跟住又跌過，跌也快，升也速，唔係專業炒家，成日對住電腦睇市嘅話，點追沽呀？我地普通人嘅唯一投資方法就係買穩陣股長揸，不理日常變動，否則心臟難以負荷。
上星期朝早明明睇住股市升，但未到午飯時間，已經回落，乘地鐵過海到尖東吃午飯，地車上遇到建制派愛國分子金融H，唔問佢市道嘞，邊個識睇啫，故意問佢：「習大大大權在握，睇樣子起碼做多十年，你是否擁護？」金融H大大聲講：「擁護，為咗維穩，為咗中國夢，習主席再做下去，係國家之福，可以實現中國夢。」左丁山說：「我又唔係大公，文匯記者訪問你，使乜咁高姿態呀。」到尖沙嘴落車嘞，金融H去半島嘉麟閣，左丁山去尖東香格里拉香宮，出閘後就講拜拜，點知金融H拖住左丁山耳語：「公開講我就一定支持修憲嘅嘞，但中國過去36年相當穩定，江澤民、胡錦濤遵照鄧小平意願，各領風騷之後就歸隱幾好吖，又冇政治鬥爭。我其實驚驚地習主席修憲之後，一個唔覺意，會成為眾矢之的。中國過往幾千年世襲終身制，幾時有過好結果呀！」
言畢，金融H急急腳行咗去。身為建制派都幾辛苦，公開發言，未必係真正內心說話。其實在亞洲嚟講，已漸漸習慣西方之民主選舉輪換制，四至五年一趟，未必一定最佳，但好多人忽略咗，輪換在亞洲有特別一層意思，係左丁山在泰國留學時經歷學生運動、政變、民選之後又由軍人當政嘅經驗領略到嘅。即使唔係清潔有原則之選舉，輪換領導係可以做到「均分利益」。做官致富係亞洲幾千年傳統，根深蒂固，只有西化歐化已久嘅日本、香港與新加坡，可以話官僚系統性貪污已經近乎絕跡。既然如此，上台做莊搵到肥水，在適當時候就應該走啦，唔好過份戀棧，阻住其他集團發達。菲律賓在馬可斯之前就是如此，泰國素來軍人大晒，以前陸軍總司令好有機會上位做首相，否則會四五年搞一次政變，但不流血，因為軍人都係想當權幾年嘅啫，菲律賓馬可斯貪得無厭，為咗自己集團既得利益，係要違憲爭取連任，卒之累死菲律賓。一個派系當權太久，同路人家肥屋潤，其他派系變成清水衙門，頂多忍你十年八年，此乃亞洲國家不能有長期不願走嘅領導人嘅最現實道理！
没有评论:
发表评论