■三道菜午餐 $340，前菜 Crab Salad。
英國米芝蓮廚Jason Atherton的餐廳，香港都有得食；去新加坡都要找Jason Atherton，醉翁之意，應該在花：更正，是參觀 Gardens by the Bay，順便幫襯。貴為「花之小巨蛋」 Flower Dome內的主要食肆，由Jason Atherton打骰的Pollen，盡了一切主題餐廳的本份。譬如說，迪士尼會將早餐班戟切成米奇形吧，Pollen也有本事將所有菜式做成鮮花一樣，伴碟加朵花、隻碟又畫朵花；面對一盤盤繁花似錦，邊個位切先呢？咁落刀會唔會冧？每一步我都要想很久；放入口，不知是外頭花天花地所致，還是我真的唔小心食到花，每一啖，都彷彿有花香飄送，食完，就好似金庸小說的女主角般，感覺呵氣如蘭。
■甜品 Banana Madras Curry。
Pollen
網址：http://www.pollen.com.sg
■原裝百子櫃 Feature wall，女店員手上的蛋糕是招牌Black Velvet Cake，$43。
中峇魯是新加坡第一代公共屋邨，一整群建於1930年代的純白矮房，近年吸引不少文青進駐。The Dispensary是新近加入個性小店。在門外打量好一會，猶豫不敢推門──明明說這兒是Cafe，為何左邊有一排百子櫃？又唔見有枱凳座位？老闆林先生大概看我一臉狐疑，熱情招呼我入座。在百子櫃前點過咖啡，穿過一道走廊，裏頭原來別有洞天！門左方有個Open Kitchen，其餘範圍放了幾張小圓枱，中間位不知怎地伸條樓梯通往露台，露台側邊又有門連去一間大房，房隔籬再有房，然後又有房。我生平未見過一間Cafe佈局如此刁鑽，令人聯想到一間陳年藥店主人，被債主臨門匆匆着草，留低一屋舊物，而又被偷得七七八八。「係專登㗎！呢度前身係中藥店，你睇呢啲電線、牆壁，幾有味道，成個新加坡都搵唔返，所以我哋留返晒做裝飾。」林先生說，上手中藥店開了幾多年、有甚麼故事，他一無所知，亦唔知去邊度查，不過見有咁多舊嘢，有歷史價值，就盡力保留；就在咖啡吧的旁邊，架了一台螢光幕，播着裝修時拍下的圖片Slide Show，連石屎爛牆都專登搵部機嚟播，老闆是真心愛舊物，「保育是應該做的，我都想在香港開一間。」等你！
■內櫳的改動減至最少，保留5、60年代的風格與風味。
■鐵秤當成掛飾，其實很有型。
■Dispensary中文解作藥房。
The Dispensary
網址：http://www.thedispensary.com.sg
