生人勿近
栢芝佗衰家 甄子丹賺少三千萬
2011年11月10日張栢芝離婚後狂接戲銀，跟章子怡合作的電影《危險關係》，是非多片酬高，收足千五萬人仔，有老闆肯揼水，不過栢芝經常失蹤又鍾意話事的特性卻不變，嚇怕唔少與她合作過的導演。
據了解，本安排明年三月開拍，栢芝跟甄子丹合作的警匪片《殺手夫妻》，便有指因導演林超賢怕咗栢芝拒接，加上無導演肯接手，令電影難產，殃及甄子丹見財化水，痛失三千萬人仔。林超賢拒落疊
按原定計劃，張栢芝甄子丹明年三月會合作新片《殺手夫妻》，該片由栢芝經理人公司新娛樂投資，檔期、導演一早落實，單是兩位男女主角的片酬，已經超過五千萬港幣，加上其他卡士及製作費，投資接近一億。不過，即使有老闆肯開水喉，導演林超賢卻臨時縮沙。
「好多同栢芝合作過嘅工作人員，都話佢喺片場成日鬧情緒，甚至郁啲就走咗去，之前佢同馬偉豪合作《河東獅吼 2》，都係佢經理人公司投資，但栢芝照樣玩無故失蹤，幾個鐘都唔見人，要出動經理人去摷佢。
「試過喺現場要等，栢芝就即刻發脾氣，話導演鏡頭擺位有問題，又試過當住成隊 crew教導演拍戲，啲 crew有唔少人，睇唔過眼，劈炮走人返咗香港，最後都係導演唔想爛尾， 氹番啲工作人員返嚟繼續開工。阿 Lam（林超賢）當然收到風，好多導演都勸佢諗清楚，事關埋咗位就甩唔到身，佢有大把 job喺手，梗係唔想受氣啦。」知情者說。
林超賢執導的《証人》及《線人》，先後幫張家輝及謝霆鋒取得影帝，不過對謝前度則避之則吉，唔想在片場受氣。
今年初拍陳勳奇執導的《楊門女將》，在蒙古拍外景的張栢芝已經麻煩多多，不時以天寒地凍捱唔住返香港，月初，為遷就她出席首映禮，更要大班演員停工配合。
馬偉豪在《河東獅吼 2》跟張栢芝講劇本，態度寸爆的她像大爺一樣坐在私家椅，要導演跪在身邊講解。
調前蕭定一
林超賢唔玩，投資者只好臨急搵其他導演接手，不過分量夠兼且啱男女主角心水的人選，無一個肯執二攤。電影難產，工作檔期排得密麻麻，見財化水的甄子丹即時作出調動，將跟蕭定一合作，預計投資一億五千萬的《 3D急凍奇俠》提前開工。
日前，記者發現甄子丹跟蕭若元父子、編劇胡耀輝等幾個男人在大坑 Blue Lemon餐廳開會，傾足兩粒鐘，全程戴住黑超的甄子丹手郁郁，講個唔停。接近七點，一行五人才陸續離開。
「蕭定一呢套戲要投資過億，有三個導演，子丹會做埋動作導演，所以佢都好緊張，一班人成日度橋開會，希望有新嘢出嚟。」知情者說。
對於跟張栢芝合作的新戲胎死腹中，甄子丹發言人張小姐表示：「子丹都好想同栢芝合作，只係有啲細節未配合到，可能遲啲會拍番。」
至於被指臨時縮沙的導演林超賢則回應說：「我哋（指與投資方）係接觸過，但有啲嘢配合唔到。」
新戲難產，甄子丹即變陣，將跟蕭定一合作的電影《 3D急凍奇俠》提前開拍，日前，他跟蕭若元父子，編劇胡耀輝等人在餐廳 happy hour開會密斟。開完會，甄子丹先行離開。
跟王晶合作電影《無價之寶》，在首映禮上，張栢芝踩劇本唔掂，她要為有份演出的兒子改對白，搞到導演兼編劇的王晶面燶燶。
早前跟章子怡合作《危險關係》，兩人因女一排位爭餐死，在發布會上更擺明車馬冇偈傾。
茶煲阿姐
圈中出名麻煩的女藝人唔少，擺款扮大牌，多多要求要話晒事乜都有，拍戲講團隊合作，對呢類「風格化」藝人，紛紛避之則吉，合作可免則免。
張可頤
出名麻煩奄尖， 03年奪得 TVB台慶「我最喜愛的女主角」後，一朝得志語無倫次，連環寸爆佘詩曼、郭可盈等花旦，搞到神憎鬼厭。近日有份演出新劇《天梯》，張可頤又不滿陳豪、陳茵媺的戀情搶晒風頭而唱爆陳茵媺。
宣萱
去年拍《掌上明珠》，有傳宣萱頻頻掟劇本鬧人，又無故失場，令拍檔商天娥非常不滿，拍掌摑戲假戲真做，又大呻「我同宣萱唔夾」。早前拍《萬凰之王》，宣萱又不時要求跳拍自己戲份，催劇組收工，遇對手 NG即黑面，更有指她眼紅同劇的胡杏兒角色較有發揮，多次與高層交涉不遂，因此視對方為眼中釘。
蒙嘉慧
有傳蒙嘉慧同鄭伊健拍拖後，工作態度愈來愈散漫，又不時請假唔開工陪男友。 07年拍攝《法證先鋒 II》，她向劇組請假不遂，竟然詐病攞假出活動搵銀，因而與監製梅小青結下牙齒印。 09年拍《誘情轉駁》時，監製徐遇安明知蒙嘉慧惡搞，刻意重用陳法拉，蒙嘉慧慘變二線，可有可無。
没有评论:
发表评论