蘋果日報- 莫言快無言 - 左丁山

莫言快無言 - 左丁山

2012年諾貝爾獎得主名單，已全部揭曉，身邊嘅中環朋友對科學獎項冇乜興趣，橫掂科學咁高深，大家識唔識，關係不大。不過對於經濟學與文學，點都識少少啩，經濟學獎得主係「穩定配對」理論與實驗嘅創始人，不少金融界朋友略知一二，可以討論吓，講吓男追女，女追男，如何達至均衡穩定效果。但文學獎得主係中國作家協會副主席莫言，我地成班人得知消息之後，竟然有口難言，莫言究竟係邊個？如果事前盛傳得獎嘅村上春樹，大家就多嘢講咯，開個「挪威的森林」論壇都得，但莫言喎，慚愧之至，竟然冇人讀過佢嘅小說。


「莫言」報道鋪天蓋地而來之後，左丁山先至醒悟：「乜張藝謀紅高粱係改編自莫言小說嘅咩？」再碰到會計N，問佢識唔識莫言，佢話：「識呀，有一次喺上海核數後，逛書局，見到一本『豐乳肥臀』，書名夠晒吸引，咪買嚟睇吓咯，仲以為係艷情小說㖭，原來係諾貝爾文學作品咁緊要！」


攞咗諾貝爾文學獎，莫言以後寫乜都得啦，寫色情小說嘅話，都冇人膽敢話佢係三級作家，只會引來大學文學教授寫論文，將莫言之小說與「查泰萊夫人的情人」合論，分中英怨婦偷漢之文化深層次異同。以中國人之一窩蜂作風，「莫言研究」即將興起，讀緊現代文學嘅，最好鬥快寫一份以莫言小說為本嘅博士論文，例如：「從莫言小說看中國墮胎與一孩政策」諸如此類。


呢日與一位來自大陸嘅賓架傾中國經濟數據，順口問佢有冇睇過莫言，佢打個哈哈：「豐乳肥臀！」跟住話：「莫言小說雖然有名，但在國內銷路普通，遠遠比唔上韓寒啲小說，加上盜版猖獗，莫言唔係賺到太多銀両，佢嘅小說內容以農村生活、農民家庭為背景，城市讀者冇多大興趣，而農民又覺得佢嘅小說係陽春白雪，唔啱睇！依家當然唔同晒啦，莫言小說賣斷市，佢以後應該可以發達嘞！佢亦會帶挈好多人發達，例如佢鄉下就已經動佢腦筋，開發旅遊景點啦！」係嘅係嘅，連莫言都感慨言之：「不如將高密鄉改名為諾貝爾鄉」。佢就快被人捧到上天，捧為搖錢樹，令佢對中國特有現象無言以對嘅嘞。