以前要玩全景相，過程好繁複，戙好腳架影完幾張相之後，再過入電腦用軟件相駁相，先搞到張全景相。後來手機加入一掃全景，拎住手機橫掃就掂，輕鬆好多。
仲嫌煩？ Ricoh新相機 Theta，㩒個掣影勻東南西北上下左右 720度全景，先拍攝後構圖，仲邊有藉口話難玩。
玩得瘋狂，點只影靜態相，連影片都拍埋全景， replay時隨時轉角度都得，自己話事。
Ody Leung
專門製作網上廣告，於 YouTube設有專頁，總觀看次數超過 500萬。為求新意，經常要諗古靈精怪拍攝角度。
Theta的機身設計好特別，正反兩面各有一個魚眼鏡頭，毋須移動機身，㩒個掣就影齊 720度全方位景物，仲識自動執好接駁位，然後用 Wi-Fi駁手機，就可以無線影相或抄相入手機，簡單到大人細路都影到。
YouTuber Ody試玩了一個星期，輕易諗出好多新橋玩盡部機，「坐船時試過伸部機出去，已經可以影埋成個船身；又試過將部機擺入雪櫃，見到女朋友開雪櫃門，就用手機遙控拍攝，效果都好得意。」話就話 Theta影到 720度全方位相，不過， Ody表示鏡頭與鏡頭中間始終有死角，用手揸機拍攝的話，雖然影不到機身，但手指的合併位會好礙眼，而機側兩邊的景物亦會出現變形，影相時最好不要有人「責界」。
雖則有少少瑕疵，但 Ody話玩相的自由度好大，就算是同一張相，都可以轉出不同效果，「簡單到影公園草地，已經可以玩餐飽，例如將全景草地相屈成星球形狀，或反轉將天空變成大洞，好搶眼。」扭曲特效
一般草地自拍 shot
同一張相，可以扭出不同效果，想扮小王子降落小星球，或井底觀天都得。
超級風景
Theta夠細部，拎埋上山影，效果氣勢十足。
地上唯一
同時採用兩個魚眼鏡頭的 Theta，設計破格，鏡頭背對背安裝，可攝出 720度全景影像。機身不設屏幕，雖然可裝手機專用 app（ iOS及 Android均有專用 app）遙控影相或儲存相片，但專用 app不設 LiveView功能，所以構圖完全靠估。好在拍攝出來的影像可以隨意翻轉扭曲，好易整到得意構圖。
要俾朋友翻睇隨意轉換視點效果，只可用手機專用 app；或將相上載 Theta網站，再將連結分享到 facebook先睇到。
兩個魚眼鏡頭超突出，小心刮花。
在 app內亦可將 720度相片還原為普通全景相片，大小約 1MB多。
規格
Theta
對焦距離： 10cm至無限遠
曝光控制：自動
ISO： 100至 1600，自動
快門速度： 1/8000至 1/7.5秒
記憶體： 4GB
電池：內置，可拍 200張
體積/重量： 129/ 42/ 22.8mm/ 95g
售價：＄ 4,590
網址： http://www.theta360.com
博客俾 Like
Jonathan Sin
開設「香港美食旅遊」 blog，年初網購美國開賣的 Theta，並買入不少配件為 Theta增值。
自從上年得知 Theta即將推出， Jonathan已經非常關注部機，今年初於美國推出，他即透過集運網購，第一時間運返香港，「平時寫 blog要影好多相，為求令粉絲覺得有新意，所以買入 Theta。」用了近三個月， Jonathan最滿意操作夠簡單，「介紹餐廳或購物景點，毋須再逐個位置影，㩒個掣就影到，網友可以自由轉換視點，慳番好多時間，又有新鮮感。」
玩了幾次之後， Jonathan再買入自拍棍及小腳架，配合手機遙控拍攝，「 Theta實在影得太闊，無可避免要入鏡，不想每張相見到自己隻手拎住部機，所以就用腳架固定，自己就可以行開擺 pose兼遙控影相，效果自然好多。」
為方便自拍， Jonathan特別在淘寶買入自拍棍及小腳架。
Jonathan話 Theta影暗景，表現一般，事關系統自動推高 ISO，令影像出現頗多雜訊。
相片除可上載到 Theta網站， share條 link俾朋友翻睇之外，亦可以抄 code嵌入到自己的網站。
手機全景
影全景相，好多手機都做到，但想玩特別效果，最好裝埋以下 apps，可以有更多玩法。
玩全景相未必要去海邊，就算在市區，用高樓大廈圍住做背景，影出來效果都好得意。
合併之謎
影像與影像重疊的範圍愈大，出來就會愈自然。
以往影全景相，須獨立影多張相片，再用軟件或人手，辨認相片邊緣景物合併而成，過程繁複，亦好易對錯位。
自從微軟於 08年發表 Photosynth技術，合併相就更準確易用，因為系統在影全景相時，會拍攝更多影像，合併時要求影像與影像之間必須有一半範圍重疊，出來的效果就更自然。近年 Android手機（ 4.2以上系統）內置的 Sphere 720度全景拍攝功能，就是採用近似技術。
查實 Photosynth技術使用權向來開放，礙於以往流動裝置的運算能力不足，所以直至上年大部分手機配備四核心處理器及 1GB以上 RAM，先開始令 720度全景相普及。全方位接合
而家不少手機、相機都可以做到一掃全景，不過想真正影到全方位，就建議用微軟的 Photosynth，除了左右 pan，仲可以上下影埋，然後自動整合成為全方位相。雖然都幾簡單，但如果想有最理想效果，構圖時要儘量選擇顏色豐富、線條分明的背景，讓系統更易搵到接合位，例如試影高樓大廈密集的地方，出來的效果就好過藍天白雲相。
去郵輪碼頭試影海天一色靚景，但部分位置因為無 details，系統未能辨認出合併位置，失敗！
建築物夠多時，反而可以接合得好靚。
（完整效果可上網睇： http://photosynth.net/view.......2535-4108-bceb-8ce12ee80822）
操作簡單，只要睇住畫面，移上移落填滿黑色位就得。
Photosynth
支援機種： IOS、 Windows Phone
售價：免費立體變球
拉下面的 slide bar，可以放大縮細「星球」，拉到合心水先按 save儲存。
嫌影 panorama來來去去得長條形未夠好玩，近年外國興玩 polar panorama特效，將全景相屈成小星球。雖然用 Photoshop等電腦執相軟件都好易搞，但而家用 Planet Camera手機 app就更簡單，匯入全景相再㩒個掣，前後兩秒搞掂，簡單得多。
Planet Camera
支援機種： Google
售價：免費震震自轉
識得自轉影，可以影埋 360度 selfie相。
懶人影 panorama，一定要裝 Cycloramic，事關有個 handsfree模式，拆手機保護殼後將部機戙直擺，系統就識得靠手機震動， 360度自轉一周影相，全程毋須用手掂。記住要搵個四平八穩的地方放 iPhone，否則震兩震跌爛部手機就弊傢伙！
Cycloramic
支援機種： IOS
售價：$15睇點度位
Pan手機影全景相，最難 hold實同一水平位置，始終 pan機時隻手點都有偏差。用 Panorama- 360就無問題，影相時畫面中央會有個白圈俾你對位， pan機時只要將圓點移入白圈中央，就代表 keep到同一水平，毋須驚影影吓走了位，好方便。
靠 app指示水平 pan相，話咁易就影到重建中的觀塘全景。
跟足指示，將白點移入白圈中間就搞掂。
Panorama- 360
支援機種： IOS、 Google
售價：免費最強全景片
AirPano會不定期更新網站的全景影片，而且可選擇三種不同解像度播放，不過一定要支援 Flash先睇到。
720度全景相好易玩，但講到 720度全景影片，難度就高好多。外國有不少攝影師開始向難度挑戰，當中由俄羅斯攝影愛好者於 2010年成立的 AirPano，玩得最勁，一入主網就有一大堆全景影片，只要在播片時用滑鼠拖拉，轉換不同視點，畫面就會跟住移動，點扭都得。器材方面， AirPano出動 DSLR拍攝，解像度夠高，精細過睇《瞬間看地球》多多聲。不過，靚當然要付出代價，單計攝影器材及軟件，花費接近十萬元，加上屋企要有部高階電腦做幾個月後期製作，自問有錢有時間，不妨挑戰。
網址： http://www.airpano.com點拍全景片
step 1
拍攝全景片，鏡頭角度要夠闊，所以 AirPano成員會用四支 Sigma的 APS-C片幅 10mm魚眼鏡（$5,280× 4）配上 Canon 5D Mark II全片幅相機（$15,800× 4），攞盡支鏡視點。不過，由於鏡頭設計採用一體式遮光罩，用在全片幅相機時會遮擋景物，所以拍攝前要先切除遮光罩。
step 2
將切去遮光罩的魚眼鏡裝上四部全片幅相機，拍攝的影像會出現黑邊，但可視角度會變闊。
step 3
將四部相機圍圈裝上特製的攝錄架，確保四邊每個方向都影到接近 180度影像，方便之後用軟件結合成全景影片。
step 4
將攝製器材裝上車或直升機，並同時啟動拍片。為了拍攝出來的影像在光暗、白平衡有一致表現，須以手動模式將四部相機設定成相同的拍攝數值，並以每秒 15幅的影片速度拍攝沿途風景。
step 5
後期製作首先採用 Sony Vegas影片編輯軟件（約$1,090），除了配對四條影片及進行初剪，亦可裁走黑邊、旋轉畫面等，並將每段影片分拆成獨立相片作合併處理。
step 6
之後使用免費影像合併軟件 PTGui PRO將影像合併成全景相，完成後，再用 Adobe Premiere軟件（約$800），將 720度全景相再次合併成影片。
step 7
要做到播片時自由轉換 720度視點效果，可使用免費軟件 krpano Flash Viewer幫手。
没有评论:
发表评论