【明報專訊】財經界有財演，政界也有大量政演；近期表現最令人「O嘴」的，應該係英明神武嘅梁特，同埋懂得隱身術嘅劉華。
上回講到，香港突然變成唔用腦，中環一帶即有人問小弟，「係咪睇咗大前研一嘅《低智商社會》呀？」哦，2013年大師級作品，未睇晒，不過佢主要係痛斥日本社會「不思考」、「不負責任」，陷入人云亦云嘅年代。
對話後臉書一面倒讚學生
咁啱撞着最近香港個局面，好容易可以用「唔用腦」、「低智商」去詮釋，而表表者就係政府，筆者唔想用「高官低能」去形容，但奈何詞窮，唯有「用住先」，事關經過一場學聯五子與政府五官對話後，臉書遭洗版，一面倒讚揚學生，佢哋理直氣壯，有節有理，贏晒﹗
齋坐有相影 將來可論功行賞
事實上，大家預咗班官只能打官腔，但最令人費解的是，為何政界劉華可以全場齋坐，不發一言？
作為政制發展局副局長，月薪廿萬的劉江華，從前在立法會能言善辯，是保皇黨大炮手，入到政府後變鵪鶉，既然唔準備發言，點解要坐喺度？筆者有個大膽假設，全因這是領功嘅重要證據；君不見當年打大鱷，曾蔭權、許仕仁同任志剛「三劍俠」的合照深入民心，呢張相仲成為他們其後被中央器重、步步高陞的憑證，雖然部分人士最終下場慘不忍睹，此乃後話，重點係影相嗰刻的光榮。
說回今次政府與學聯的世紀對話，中央是知道林鄭等人難處的，雖然未必可以一蹴而就，但至少已釋出善意，進行破冰，五個參與的官員，日後政改有乜轉機，都叫做有份參與，好過被抽走戲分的梁特。劉華其實係超級醒目，不發一言，不會犯錯，有乜冬瓜豆腐都可以淡化自己角色，但一有功領，又可以話自己有份參與，這是打工仔的最高境界，服﹗
話說指揮中心已非姓張大佬
醒目華甘於做一個無對白的政演，相反，梁特就似乎失控了，連阿爺個劇本都唔跟，仲處處為難上位中的女主角林鄭月娥，今次呢套戲，其實好多撻Q位，𠵱家中環至西環一帶，都傳緊點去處理呢位男主角。話說深圳的指揮中心，導演已非姓張的鷹派大佬，而是一名路過澳門再折返深圳的務實大臣。
梁錦松轉投南豐 部署入閘
路邊消息話，老董撐梁是真的，但此梁不同彼梁，真命天子是梁錦松，而他本人最近亦有所動作，做好打仗的準備，私下約見老朋友請教。另有商界口痕友話，阿松由美資的黑石，轉投本地華資的南豐，完全係為了洗底，部署入閘。
南豐呢類家族式管理，外人點可以插入去大展拳腳？阿松純為泊岸，南豐亦有着數，以低成本參與造王，何樂而不為？
阿松敢於披甲上陣，皆因阿爺已看到梁特不諳金融的禍害，故下屆特首候選人，很大機會也來自財金系。有朋友亦同筆者講，雨傘運動遍地開花之後，董系派出人馬四處搵人擔當中間人斡旋，睇嚟老董都開始同佢兩年幾前出盡奶力力捧的梁特劃清界線。
董系人馬搵人當中間人
另一轉折點是不少前唐營人士加入老董智庫，包括唐英年，而以往支持梁振英的新世界系幕後軍師紀文鳳，以至一位恒隆系公關要員，也加入了董陣助松。
再加上梁特近期異常的表現，包括接受紐約時報訪問指月薪萬四蚊以下的人，不可享平等的選舉權，此等有違他上位之道的說話，除了在各方致力和平解決問題前挑動社會矛盾外，實在看不到有任何有利社會的作用。何鴻燊曾經說過，梁特仇富，如果當選特首，佢會返番澳門；如今梁振英連支持他的基層也得罪埋，寧可自我毀滅，也不成全任何人，如此瘋狂的政演路線，已經相當失控。
[應正亮 廿四味]
HH
没有评论:
发表评论