�果日�- �付英文�媒 - 左丁山

應付英文傳媒 - 左丁山

左丁山講特區政府會運用宣傳策略鼓動不佔中市民反佔中，大打民生牌，單靠政府唔做得咁多嘢，要搵人幫手至得。十月七日全港收費、免費報紙（蘋果除外）都有「幫幫香港出聲行動」（Silent Majority For HK），煽動香港人反佔中，講出七點，左丁山注意到其中一點係：「外國及主要傳媒只會報佔中英勇正義，市民反對聲音誰會理？言論自由，他們有，市民呢？」


幫港出聲主理人周融老兄係資深報人，做過英文虎報總編輯、快報出版人，話佢唔識新聞報導，就係儍仔。但為了政治，有時就「故意 說不清」，可惜也。CNN就曾請周老兄寫過一篇反佔中文章，左丁山在CNN網站睇過，CNN在十月七日就猛咁報導Protests are hurting Business（示威傷害商業），好多師奶，中小企曾打電話到烽煙節目訴苦，大罵佔中，點算冇言論自由呀？如果話外國傳媒唔公道，政府要自己檢討吓至得。餐廳R係外國人，聽住香港電台第三台英文新聞，佢對左丁山投訴過：「政府搞乜嘢呀，個高級警官對英文台記者講到結結巴巴，英文發音不清，講話內容無條理，我哋鬼佬聽到火滾。反之，記者訪問幾位示威學生，佢哋居然講英文好流暢，有條有理噃，特區政府點解搵唔到一位識講英文嘅高官應付外國傳媒？」


左丁山冇聽港台第三台，只能信住先。倘若真的如此，特區政府應該急急搵周融做警官傳媒顧問，教吓佢哋點樣應付英文記者先啦。幫港出聲理應立即教港府出聲！


幫還幫，不要幫倒忙，一位自稱清華大學學生在香港大學聽書，南華早報編輯Cliff Buddle講授「傳媒道德」，當然係用英文講，竟被呢位學生襲擊，幸好冇事。左丁山睇新聞，以為係小事一宗，大概有學生突然失常啩，但餐廳R及佢嘅外籍老友就視為大件事，話會嚇親外國人及外國投資者，以為喺香港一定要講普通話，唔講得英文。左丁山就真係幫港出聲嘞，極力解釋香港係開放社會，唔會排外！哎，港大係英語大學，就算係本地人教書，都係講英文嘅啦，何況係外籍講師？如此「清華學生」真係有辱清華園呀！

HH