大國領導人出外訪問開會，有排場，有架勢，幾十名高官隨從保鑣跟實，嗰筆費用統統由納稅人支付，都唔知向邊個問責，美國總統出外，更加大陣仗，要有埋自己美國車隊運埋去，條數以億元計。
表面風光之餘，其實啲領導人飛來飛去，未過jet lag，已要開會談論世界大事，參加國宴，作狀欣賞當地文化節目，話唔攰就假，但鏡頭面前，佢地個個笑容可掬，精神飽滿，又唔到你唔服。但強健如俄羅斯總統普京，平時以強者占士邦面目示人，可以駕駛直升機升空，可落水下潛百呎，可在地上揸電單車、戰車、燒槍、打柔道，世界領袖無人能及，皆因佢曾受過KGB特務訓練之故，如此人物到北京開完APEC再到澳洲布里斯班開G20峯會，竟然因要爭取時間睡覺，提早離開澳洲返莫斯科喎，實在奇哉怪也。奧巴馬更攰啦，佢在北京見完習近平，就去緬甸參加東盟峯會，順道見昂山素姬，擁抱在一起，肉緊似一對久別重逢情侶，然後飛往布里斯班㖭。
幾日前睇now電影台（唔記得邊個頻道咯），有一套好戲"Into the Storm"，係講邱吉爾領導英國抗納粹之二次大戰小史，邱吉爾一聽到日本偷襲珍珠港，大喜過望，知道機會來了，立即向日本宣戰，飛去華盛頓見羅斯福總統，以示支持美國打日本，乘機爭取美國支持英國抗德。邱吉爾坐嘅係運輸機，簡陋得可憐，成排人坐在冰凍硬鐵長凳上，人人攬住毛氈，瑟瑟縮縮咁，與今日金馬倫首相出行之舒服豪華場面完全冇得比，唔怪得戰前好少國際高峯會議，今日啲總統總理就好似不時參加旅行團出國訪問。普京話要瞓覺，當然只係藉口，其實佢可以玩得更絕一啲，就係趁住昆士蘭省春光明媚之際，唔提早上機返冰冷嘅海參崴，而係從布里斯班走咗去黃金海岸，在沙灘瞓番兩日，食吓昆士蘭特產芒果及有機蜜糖，順手買啲返回克姆林宮慢慢嘆先至係識享受，既然因烏克蘭問題在G20峯會備受西方聯手抨擊咯，提早鬆人未免係示人以弱，索性離開會場去黃金海岸嘆兩日先至顯得出「你吹咩」嘅威風，更何況從海參崴返到莫斯科只見天寒地凍，點似得昆士蘭咁好天氣呀。講講吓，自己都想立即飛過去黃金海岸㖭！
I
没有评论:
发表评论