【收市閒情】與LINE騙徒對話「10大原因」！
世上騙徒何其多，手機有裝LINE嘅朋友，好多都遇過LINE「點數卡騙徒」。（騙徒冒認身份Login，然後扮成事主，向通訊錄內朋友發出訊息，呃人去便利店代買網上遊戲點數卡，然後輸入指定網上戶口。）
精明嘅你，當然（應該）唔會咁易俾人呃到。不過，由另一個角度睇，如果你識得應付，呢類騙徒嘅存在都可以變得有意義。
（圖為蘋果同事親身示範，精彩Line防騙技巧，萬勿錯過！！！！）
1：如果你冇朋友
好簡單，平時WhatsApp同LINE都冇響過，難得有人搵你，當然要把握機會！想玩得耐啲，最緊要扮到你肯去買，但又「拖字訣」，吊佢癮。
2：如果你想出貨
講到尾，騙徒都係想呃錢。如果你手上有某隻股大批蟹貨，同佢講升硬，佢覺得有得賺錢，好可能會中伏。等佢真係中「Number降」，就自然幫你出貨。
3：如果你想測試騙徒有冇人性
有人試過同騙徒講：「我啱啱好有4000蚊，係幫我媽媽儲嘅手術費…不過見同你咁熟…好啦，我俾你啦。」結果得到嘅回覆係：「咁又唔需要做到這個地步。」
4：如果你係Sale屎
作為一個專業嘅Sale屎，應該把握所有推銷嘅機會。佢Sale你時，你可以借啲意而反Sale佢，佢叫你買點數卡，你就同佢講：「你裝咗收費電視，我就幫你買。」「其實打機多對身體有影響，不如你同我買咗份保險先啦。」就算佢唔買，你咪當係訓練推銷技巧囉。
5：如果你係傳道人
同Sale屎道理一樣，叫佢落咗教會先俾佢。如果佢唔肯（多數都唔肯），都逼佢搵段經文讀一次，起碼佢接觸過聖經，話唔定佢會因為呢一句經文而受感動，咁世上就少一個騙徒，多一個教徒。
6：如果你都係正義人士
同佢講話你都係騙徒，想合作一齊去呃點數，話交換一啲肯俾錢嘅Acc資料，令佢俾Contact你。然後通知嗰啲被騙人士，斷騙徒米路。
7：如果你冇拖拍
叫佢扮你男或女朋友，講啲Sweet嘢（乙水）你開心，「你講你愛我先啦」「你講你會掛住我先啦」。難得有人（乙水）自己開心，何樂而不為？
8：如果你係黃絲警察
我唔排除警察有正義人士，但佢哋夾喺中間，又唔敢同任何人講自己其實係黃絲，左右做人難。遇到騙徒，就當佢哋係「樹窿」，講晒一直唔敢講嘅野出來。（當然你要換咗Acc名同相先）
9：如果你需要網絡打手
呢類人咁得閒，叫佢去開幾個facebook帳戶，喺你需要呃Like嘅Page度俾咗Like先啦！Like呃得一個得一個。
10：如果你係689
689都敢呃！叫佢落旺角，大叫一聲「我係蘋果記者」，拍埋片先交收！
其實唔想自己Line Acc俾人Hack，好簡單：
於「設定」入面，選取「帳戶」，再設定密碼。
當你用第二部手機登入 Line 時，就會要求輸入換機密碼，咁就會相對安全啲啦。
by千頌C@堆填區
http://fb.com/winbigwok
发自我的 iPhone
没有评论:
发表评论