潛龍碟影：鬼佬丹爺 獨家表演 - 龍叔叔
踏入2015年，影碟商仲未減退holiday mood，藍光新碟靜到飛起，落到灣仔探碟舖老闆佳哥，佢都話個市好悶，靠幾套高清舊片同美版鐵盒吊住命，新年流流真係大吉利是。佢舖頭正demo緊套《超能煞姬》，由《復仇者聯盟》黑寡婦Scarlett Johansson擔正，着住緊身小背心透晒喱士內衣跑嚟跑去，隻碟應該幾去得㗎喎，可惜佳哥話係台版，唔啱龍叔叔喎。龍叔叔慣咗港版碟嘅繙譯，對歐巴桑、保全等字眼好抗拒，有得揀都寧願等港版碟出先睇。好彩仲有套《叛諜裁判》（The Equalizer）揀得落手。史泰龍、成龍仲keep住拍動作片，不經不覺，丹素華盛頓都花甲之年，仲學人扮殺手拍動作片？龍叔叔預咗伏伏哋，對鬼佬丹爺仍是兩肋插刀、畀錢買碟，不論佢過往拍過唔少爛片，龍叔叔總期待能再遇一次《紅潮風暴》、《邊緣特訓》、《骨中罪》嘅精采。
正所謂是福不是禍，《叛諜裁判》繁中字幕，又係用晒台灣用語。算，片長兩粒幾鐘，都叫過足丹爺癮，有愛就好。幸好主角演出實在精采，初段扮隱世平民，同左鄰右里傾吓偈、食個dinner又一日，似生活小品片多過動作片，一心睇打打殺殺子彈橫飛嘅話，應該瞓着幾次，但龍叔叔就好enjoy佢嘅親民演繹，連佢把聲都覺得好迷人，一啲都唔覺悶。到中段開始為熟悉嘅人出頭，更逼於無奈出手殺人，好似蝙蝠俠咁，日頭做倉務，夜晚就化身成平民殺手，出街儆惡懲奸。嘩，條橋老套到爆，偏偏丹爺嘅流暢自然演技就係有本事吸住你眼球，亦因為片長兩粒幾鐘，有足夠時間鋪陳鄰里之間嘅關係，你會好自然咁代入丹爺立場，有本事點解唔幫多啲人？最重要係導演安東尼奎克鏡頭運用得好，殺人場面處理得極出色，好似丹爺第一次忍唔住出手，深入虎穴同俄國黑幫要人時，鎖門後一粒子彈都冇用，19秒就KO晒全間房嘅人，動作編排同鏡頭運用令龍叔叔拍手叫好，而且全無子彈狂轟血花四濺，以靜態手法拍動態場面，實在新鮮。
後半動作場面出色
到中段丹爺真正身份逐漸顯露，你會明白點解一個平民有咁高殺人技巧，對跟住落嚟嘅連場大戰增加咗說服力，其中一場倉庫大戰，丹爺仲係一槍都唔開，隨手拿起鎚仔等裝修工具就完美清場，精采！呢兩粒幾鐘過得好愉快，唯一要彈係結尾有種草草收場之感，可能留番拍續集啩。
BD聲畫上算不過不失，雖然激烈情節唔算太密集，不過反凸顯出動作戲份嘅聲效處理，而且唔會由頭轟到尾，睇得幾舒服。要插吓港版嘅戲名，又冇高科技武器又冇計中計，乜鬼嘢「叛諜」啊？龍叔叔起初仲以為係麥迪文嘅《叛諜狙擊》系列𠻹，擺明對丹爺冇信心啦。
《叛諜裁判》BD（灣仔價約$210）
龍叔叔簡介：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
上一則: Halo 5 Beta版搶住試
下一則: 幕張飄移 東京改裝車祭預覽
I
没有评论:
发表评论