中國素無海軍 - 左丁山
肥仔K留日同學到呼和浩特娶妻，將來會在呼和浩特、北京、香港、東京遊走，居住，此乃21世紀新一代人物嘅特色之一，工作與生活夠晒流動性，因此各大城市嘅國際學校最受歡迎，因為新人物所生子女好難入讀本地學校，一定要跟隨父母去到邊，住到邊，讀到邊，X同學未來嘅子女一定會自小學習普通話、蒙古話、廣東話、英語、日語，雖未必一定會成為語言專家，但學習四文五語已屬必然。肥仔K見到蒙古文，覺得與滿文極為相似，蒙古朋友話佢知：「女真族正旗人，自古臣服蒙古，直至入關奪取中國江山為止，故此滿清人文字係自蒙文學習，變化而來。」點解今日全中國冇乜人識滿文，滿族似已完全消亡？此則因為蒙古人佔領中國不夠一百年，已被朱元璋（明太祖）趕回塞外，反之滅明之女真族成立之清朝則在中國統治三百餘年，關內外之滿人徹底漢化，用漢語，最後清朝滅亡，中國連年戰亂至日軍侵華，滿人從無機會在東北恢復原來滿族文化，如此這般，我地小學時讀書中國有漢滿蒙回藏五大民族，依家就只剩下漢蒙回藏四大族，可幸蒙回藏語言還能保留至今。
肥仔K回港之後，與左丁山講起自忽必烈派兵征日失敗之後，中國未曾主動派兵到日本開戰，反之明代日本海盜浪人（統稱倭寇）不斷騷擾中國沿海，豐臣秀吉派兵入侵韓國與明軍交鋒，直至清代有甲午海戰，中國大敗，二次大戰時中國受盡苦難，雖有三幾次大捷（如台兒莊大捷，長沙大捷），始終無力趕走侵華日軍，好彩日本軍人（主要係陸軍將領）衝昏了頭腦，竟然轟炸珍珠港，逼使美軍參戰，最後日本先至一敗塗地，故此日本人至今還認為二次大戰戰敗，係向美國投降，奉美國之命在大陸向中華民國投降，言下之意，就係唔肯認戰敗給中國。
左丁山認為中國不斷吃日本的虧，軍隊積弱，源於海軍水皮到極。鄭和下西洋前後，明朝昏君下令海禁鎖國，鄭和死後（1433年），鄭和累積之海上軍事力量全部自我毀滅，中國人開始唔識造大船、戰船，幾百年全無海軍可言，直至清代末期先至開始建立北洋艦隊，又敗於官員將領貪腐瀆職兼無能，反之日本自古有海戰經驗，明治維新後認真學習西方之堅船利炮科技，1920、30年代已有能力自建戰艦，侵華前已有美國級數自建航空母艦，而當時中國連一隻似樣戰艦都冇點同日本人打呀？追源禍始明代係最抵鬧嘅。與日本人打仗，無強大海軍就不能抗敵於外，難以將戰場延伸到日本諸島，現代海軍更需要強大空軍支援，反而陸軍作用不太大。中國歷史上素無海軍，咪一味吃虧囉。（作者按：昨日本攔寫忽必烈是鐵木真兒子，其實是孫兒。謹此致歉）
I
没有评论:
发表评论