【毒L識食】兩分鐘超簡單微波爐芝士炒蛋！
又到宵夜時間～返返嚟毛毛毒L食譜，今日同大家整簡單到喊嘅微波爐芝士炒蛋，唔講係微波爐叮拎上碟扮真炒蛋都呃得下人㗎！
首先將一隻蛋打落個兜度，發開佢。
之後放一塊芝士喺中間～
點解要落芝士呢，除咗毛毛鍾意食之外，仲係因為芝士會令到啲蛋夠咸，一嚟唔使行去廚房攞鹽，二嚟唔使自己落鹽咪唔使驚落得多得滯咸到腎虧囉。
好喇，咁就拎去叮分半到兩分鐘，未熟就拎入去再叮多幾廿秒，唔好叮太耐呀，啲蛋熟得滯會老㗎！
為咗本節目嘅效果，毛毛為大家放棄死都唔洗多隻碟嘅原則，嗱上咗碟成件事即刻唔同晒係咪呢～ 啲芝士同啲蛋溶埋一齊，真係好邪惡呀。
不過...喺毛毛洗返個兜嘅時候，先發現原來頭先個膠兜好似冇應承話放得入微波爐......
唔知呢碟蛋會唔會令呢篇食譜成為毛毛最後一篇文呢......再見喇各位......
I
没有评论:
发表评论