黃之鋒事件 - 左丁山
約三個星期前，在飯局見到泰國C，佢係資深曼谷法政大學校友，高左丁山幾班，佢開玩笑咁講：「喂，我聽到朱拉與法政兩間大學學生會邀請黃之鋒過去演講，講乜就唔知，我話不如你代表香港校友返去演講仲好啦！」左丁山立即答：「唔好亂噏，年輕學生梗係會搵黃之鋒啦，我地四十幾年前就見證過上街爭取泰國民主嘅慘況啫，而今吾老矣，無能為力矣，今日嘅學生邊會聽我地講嘢。」
與泰國C互相吹水一輪，以為冇嘢，點知呢幾日就有黃之鋒10月4日晚上9時50分去曼谷，受泰國移民局及警察在機場拘留12小時嘅新聞，聞訊不禁吃了一驚，黃之鋒一個年輕大學生啫，泰國做乜咁驚佢入境？咁啱律政司長袁國強在10月5日往泰國開會，行前答記者問，指「不相信事件涉及國與國之間施壓問題，只是個人進入泰國，泰國政府如何處理旅遊人士進入國內的問題。」袁國強此人睇嚟唔識玩政治，佢當時唔掌握情況，理應如是云云：「特區政府目前未曾掌握情況，有待向泰國查詢，我到泰國之後會親自詢問，目前香港入境處已密切注視事件發展。」咁就答咗等於冇答，唔會出錯啦。
果然，泰國軍人總理巴育將軍好快就摑咗袁國強一巴，佢對住電視鏡頭講：「有中方官員要求將他送返，是中方官員，這都是中方的事，這都是他們中國人的事。」講到咁白，大家知係乜事啦，黃之鋒隨時係桂民海在芭堤雅豪宅消失咗嘅翻版。左丁山睇電視見巴育將軍講咗幾句，語焉不詳，索性打電話搵泰國C問吓，泰國C又向曼谷朋友查詢詳細啲，聽到嘅版本係：黃之鋒未到泰國前，泰國外交部收到中國知會，講明有中國公民黃之鋒一人會到達曼谷，要泰方拒絕佢入境兼拘留黃之鋒於機場，待中方官員處理。泰國軍政府一向唔高興美國批評軍事政變，刻意拉攏中國投資，願同中國合作，黃之鋒一落機，就將佢放在一間五十平方呎嘅羈留室內。至於有冇中國官員審過佢，黃之鋒話冇，不過佢在室內見唔到室外之兩方交涉，實情幾難判斷，但好清楚嘅係，黃之鋒及其主要雨傘運動同路人（領袖搞手類）已受中國國安盯到實，東南亞國家旅行，分分鐘有一去不歸嘅危險，碰啱羅冠聰已經貴為立法會議員，下屆立法會一開波，相信就會就此事提出質詢，梁君彥做下屆立法會主席，有排頭痛。
上一則: 所謂「斯諾登風暴」 - 陶傑
下一則: 放一個離地的假期 - 林夕
I
没有评论:
发表评论