第一夫人艷照 - 左丁山
互聯網圖片
老友飯局，輪到左丁山做東，去邊度好呢？大記者近數月與媒體朋友食飯，不出東來順與益新，去極不厭，灣仔益新係粵菜老字號，所有老友都去過，反而銅鑼灣登龍街嘅東來順就對眾人有啲新意，大記者介紹一味「安格斯叉燒」，話新穎好味咁講。
於是呢日訂咗一間房，遙望維港，房外有大露台，可以出外吸煙，不過我哋班人又幾健康嘅噃，十幾年來已與香煙絕交，命仔緊要一啲吖嘛。經理為我哋寫菜，早前幾日寫咗蟹粉燴魚肚，後來見到有太湖大閘蟹含二噁英嘅新聞，左丁山費事大家見怪，立即改為鮮蟹肉燴魚肚，特色食品有蒙古烤羊腿、安格斯叉燒，各位老友咸表滿意，尤其是羊肉來自東來順之蒙古牧羊場，貨源可靠，烤得恰到好處。至於安格斯叉燒，就真係失禮嘞，還是第一次食啫，經理話：「東來順係清真傳統，不賣豬肉食品，但香港人又好鍾意食叉燒，故此廚師度咗呢條好橋，將安格斯牛肉當係豬肉叉燒咁處理，希望大家喜歡！」何止喜歡，直情係正斗，食到一件都冇剩，好似去賽馬車會食豬肉叉燒咁款。
食到甜品碗蛋黃之時，接到遠在三藩市嘅投資A嘅短訊，方知佢已與太太回港，參加家族掃墓及培正中學畢業五十年重聚活動，行程緊迫，但在三藩市有心為左丁山買咗一頂鴨舌帽，問如何交收。朋友咁好心意，豈能不見，於是飯後匆匆趕往留仙街L' Hotel見面，佢地住一間套房，可望會展海景，睇煙花就好位置咯。小甜甜生前係投資A好熟嘅朋友，現在投資A回港就一定住在L' Hotel，係有原因嘅。既自美國回來，當然要講一啲美國時事，投資A話：「我在三藩市所有朋友，冇一個投票俾特朗普嘅，但佢竟然當選，大家又嬲又暈得一陣，以後四年可能會心理不平衡。」來到香港，同學WhatsApp廣傳未來美國第一夫人Melania之艷情照片及紐約郵報（NY Post）八月一日之Melania「女與女相片」，投資A嘆曰：「凡係正經美國人，都唔知將塊面放去邊處。」呢啲係花邊新聞啫，真係正經啲講，美國政治經濟會有甚麼變化？投資A話政客競選時講一套爭取選票，上台後就會被政治現實綁手綁腳，交唔到貨。佢預料特朗普亦會如此，事實上特朗普一啲選舉口號（例如將希拉莉收監，遣返千萬名非法移民，對中國貨抽重稅）都係難以實施嘅，特朗普一定惡唔出樣，但假如佢堅持己見，咁就天下大亂咯。
上一則: 二十一世紀精英辨 - 陶傑
下一則: 嫁禍法院 - 曾志豪
I
没有评论:
发表评论