緩慢縮表難加息 - 左丁山
在中銀香港嘅投資論壇，施永青自今年年初從唱淡嘅言論急轉彎唱好樓市之後，繼續保持地產好友本色。佢轉軚嗰陣時對左丁山講過：「我啲前線同事帶返嚟嘅資訊，可靠過分析師憑靜態滯後數據推算出來嘅結論，分析師為面子唔肯面對現實，我就信奉市場動態，跟住市場實況走嘅。」
依家樓市確係暢旺到冇得頂，施永青在論壇上講：「過往QE（量態放鬆）：銀行水浸，超低息，樓市冇法子唔升！QE八年後（自2009年起計），各國央行嘅資產負債表大幅度膨脹，而今美國聯儲局話縮表，不再買債（擴表），轉為縮表（賣出債券），一啲人以為樓價會跌，但我認為未必，因為耶倫好小心，開始縮表時，每個月只會賣債一百億美元，有排都未縮完，即係話市面游資有待消化，邊會影響到樓價吖！」
施永青觀察係有啲道理㗎。美國啲證券分析師計過，每個月縮一百至五百億嘅話，聯儲局削減資產一萬億美元，需時幾十個月至一百個月，即使每個月縮五百億，亦要二十個月，相信整個過程大約需時兩年幾三年，對市場產生嘅效果甚為緩慢、溫和。
此外，特朗普上台至今，一件大事都未做得到，急需在明年年中國會中期選舉時做出一啲成績，否則民主黨搶回參議院控制權嘅話，特朗普更加跛腳。做咩嘢呢，就係刺激經濟增長，用減稅嚟刺激囉。呢位總統除咗識得罪人，搵交鬧之外，冇好事做過，點會在這個時候容許耶倫過份縮表，過份加息嚟破壞佢嘅刺激經濟大計吖；適逢耶倫任期在2018年夠鐘，多數會好似副主席費沙咁樣，自願離去，讓特朗普「用人唯親」嘅咯，既有此時間上的「巧合」，美國之加息縮表行動一定不會猛烈，施永青嘅地產投資可以安寢無憂！金管局警告「買樓靠父幹」有風險，只係一種政治動作，講定先，以免俾一啲唔識經濟嘅議員日後鬧金管局後知後覺而已，此乃「後雷曼」嘅標準動作。
林鄭月娥對樓市會係董建華（一心降低樓價）吖，曾蔭權吖（全力谷高樓價救市）還是梁振英呢（明踩實谷）？林鄭似乎唔係大起大合之人，相信一定蕭規曹隨，梁振英嘅辣招不敢廢除，也不敢推冧樓市，只會求神拜佛希望美國不斷加息，為本港樓市降溫，但特朗普必定係利率鴿派，故此本港樓市還是難以大跌。
没有评论:
发表评论