壹週Plus｜Next Plus｜專欄
十年前，如果有「2」字頭嘅電話號碼打畀你，都可能會認為有人用家居電話打嚟同你吹下水，但今時今日，遇上陌生嘅來電顯示，你八成唔會接聽，因為九成都係傳銷號碼，或者係問卷調查。之後，你會出絕招用手機App將呢堆號碼封鎖。
不過，就算識得嘅人打畀你，你都唔會仆住去接聽，反而會希望人哋先用訊息單聲，問打畀你O唔OK先，如果冇咩特別，用簡單文字交代就算啦好嘛？因為而家潮流係唔興傾電話㗎啦！講真，而家除咗工作性質需要，或者係中、老年人士，試問仲有幾多年青一輩平時會傾電話呢？
現今資訊科技發達，家居電話被手提電話取代，而手提電話嘅即時話音通訊，又被數據錄音通訊慢慢淘汰，What什麼app、We什麼chat、Face什麼book Messenger……林林總總嘅Apps，都不單有文字訊息傳送功能，仲紛紛推出錄音功能，甚至乎係拍片功能，務求達至全方位聲音影視傳遞效果。
當你睇返電訊公司寄畀你嘅賬單，明明個Plan有每月2000分鐘通話時間，但你只係用咗唔夠200分鐘；數據只係包2GB ，你就用到4GB，畀人罰錢罰到想喊……不過，而家周街都有WiFi咁方便，只要節制少少，都唔會話爆Data。但就因為數據太方便同免費，你會做出好多不必要嘅壞習慣。
之前Send SMS要逐次計，你一定會好有文有路打晒成段嘢先寄出，邊似而家打句嘢都支離破碎到要分三次寄，仲要夾雜兩個Emoji……最慘對方用錄音功能錄一句說話都要分三段，每次講幾秒，真係好煩，甚至乎有人邊錄邊傾兩粒鐘都得，咁點解唔直接打畀對方呢？
咁錄音功能係有佢獨特優點嘅，好似你搭車時大大聲傾電話，嘈到其他乘客就唔好啦，呢個時候錄音功能就幫到你，斷斷逐逐發出聲浪，應該唔會畀人側目啩？另外，錄音係可以反覆聽好多次，例如上司落嘅「柯打」，細味三次，包保唔會做錯嘢啦！又或者，男朋友女朋友嘅留言，可以永久下載保存，萬一分手都可以留個紀念吖嘛……傻啦，留低罪証就有份！
十年後，科技又唔知會發展到咩地步，到時智能手機會唔會變成超智能手機，又或者有冇其他裝置係有通訊功能，可以取代到電話，玩埋腦電波心靈感應，都係未知之數。唯一可以肯定嘅就係，「2」字頭嘅屋企電話號碼，將變成一堆數字歷史遺蹟，或者被重整合併，成為大家嘅集體回憶……
Facebook專頁：大雞小事（https://www.facebook.com/bigchickenlittlethings ）
特別鳴謝插畫師：「Nothing Serious」（https://www.facebook.com/nothingseriousfans ）
壹週Plus｜Next Plus｜專欄
真是一個比我更偉的偉論。作為一齣經典電影的延續篇，《侏羅紀世界》（Jurassic World）要成功，難度甚高。《迷失世界》（The Lost World: Jurassic Park）跟《侏羅紀公園》（Jurassic Park》只差四年，《侏羅紀世界》跟最近的《侏羅紀公園III》（Jurassic Park III）也相差十四年，觀眾的要求和眼界早早突飛猛進。《侏羅紀世界》無可避免要採用電腦特技，拍成一齣現代化大片來與時並進；偏偏，背後賣得更多的，卻是情意結，是史提芬史匹堡（Steven Spielberg）一手製造的機械質感。
新紮導演Colin Trevorrow甚有自覺，在電影中，借助唯一由第一集帶到第四集嘅科學家把口，說出現實苦況：「你哋班友仔，仲邊有人需要真實性吖？個個淨係要大隻啲再大隻啲，多牙啲再多牙啲。」立即將憑空幻想出來的新品種恐龍大佬合理化，甚有自嘲的味道。挖空心思創作出飛龍襲人群，假大龍惡戰四小龍，再到結局，借龍打龍，一場接一場。如果拿來跟《加州大地震》（San Andreas）比較，我會說不相伯仲；如果拿來跟《侏羅紀公園》比較，你就當然會覺得史匹堡那種有快有慢有動有靜以小勝大突如其來的懾人技巧高明得多。
不要拿來跟九三年的出品比較了。九三年，你剛剛追完《大時代》首播添。在電影一開場，導演已經三番四次話你知，今日的小朋友，屋企有個愛到難捨難離的女友，一出街見到稍有姿色的，又立即蠢蠢欲動。今日的小朋友，明明左眼在睇表演，右眼又可以望手機上的圖像。今日的小朋友，在Google上學到的知識，又快又多又容易。要今日的小朋友，似他的父母，見到恐龍伸個頭過來，會驚到喊，毫不容易。叫得郁他們不要連逃命也掛住selfie，更困難。大白鯊都俾恐龍咬死了，你估仲係《大白鯊》嚇到你唔敢游水的年代咩？
評分：75分