壹週Plus｜Next Plus｜專欄
一散場，一步出戲院，我已經急不及待發表偉論：「有冇搞錯呀，成個主題公園咁大，成二萬幾個遊客，遭受恐怖襲擊，就咁靠樂園嗰幾個保安自衞？連老闆都要落埋場？女主角著住高踭鞋跑足成日都算數，可能真係換唔切鞋，但係帶住兩個姨甥著草，次次都走去最多恐龍出沒的地方，嗰兩個o靚仔應該心諗：『早知唔靠你呢個高層，自己跟大隊坐社區中心好過。』」話未說完，陪我睇戲睇到掌心冒汗的黃小姐已經面都黑晒：「唔係睇套套戲都要講道理的。」
真是一個比我更偉的偉論。作為一齣經典電影的延續篇，《侏羅紀世界》（Jurassic World）要成功，難度甚高。《迷失世界》（The Lost World: Jurassic Park）跟《侏羅紀公園》（Jurassic Park》只差四年，《侏羅紀世界》跟最近的《侏羅紀公園III》（Jurassic Park III）也相差十四年，觀眾的要求和眼界早早突飛猛進。《侏羅紀世界》無可避免要採用電腦特技，拍成一齣現代化大片來與時並進；偏偏，背後賣得更多的，卻是情意結，是史提芬史匹堡（Steven Spielberg）一手製造的機械質感。
新紮導演Colin Trevorrow甚有自覺，在電影中，借助唯一由第一集帶到第四集嘅科學家把口，說出現實苦況：「你哋班友仔，仲邊有人需要真實性吖？個個淨係要大隻啲再大隻啲，多牙啲再多牙啲。」立即將憑空幻想出來的新品種恐龍大佬合理化，甚有自嘲的味道。挖空心思創作出飛龍襲人群，假大龍惡戰四小龍，再到結局，借龍打龍，一場接一場。如果拿來跟《加州大地震》（San Andreas）比較，我會說不相伯仲；如果拿來跟《侏羅紀公園》比較，你就當然會覺得史匹堡那種有快有慢有動有靜以小勝大突如其來的懾人技巧高明得多。
不要拿來跟九三年的出品比較了。九三年，你剛剛追完《大時代》首播添。在電影一開場，導演已經三番四次話你知，今日的小朋友，屋企有個愛到難捨難離的女友，一出街見到稍有姿色的，又立即蠢蠢欲動。今日的小朋友，明明左眼在睇表演，右眼又可以望手機上的圖像。今日的小朋友，在Google上學到的知識，又快又多又容易。要今日的小朋友，似他的父母，見到恐龍伸個頭過來，會驚到喊，毫不容易。叫得郁他們不要連逃命也掛住selfie，更困難。大白鯊都俾恐龍咬死了，你估仲係《大白鯊》嚇到你唔敢游水的年代咩？
評分：75分
2015年6月18日星期四
壹週Plus｜Next Plus｜專欄
订阅：
博文评论 (Atom)
没有评论:
发表评论