壹週Plus｜Next Plus｜專欄
十年前，如果有「2」字頭嘅電話號碼打畀你，都可能會認為有人用家居電話打嚟同你吹下水，但今時今日，遇上陌生嘅來電顯示，你八成唔會接聽，因為九成都係傳銷號碼，或者係問卷調查。之後，你會出絕招用手機App將呢堆號碼封鎖。
不過，就算識得嘅人打畀你，你都唔會仆住去接聽，反而會希望人哋先用訊息單聲，問打畀你O唔OK先，如果冇咩特別，用簡單文字交代就算啦好嘛？因為而家潮流係唔興傾電話㗎啦！講真，而家除咗工作性質需要，或者係中、老年人士，試問仲有幾多年青一輩平時會傾電話呢？
現今資訊科技發達，家居電話被手提電話取代，而手提電話嘅即時話音通訊，又被數據錄音通訊慢慢淘汰，What什麼app、We什麼chat、Face什麼book Messenger……林林總總嘅Apps，都不單有文字訊息傳送功能，仲紛紛推出錄音功能，甚至乎係拍片功能，務求達至全方位聲音影視傳遞效果。
當你睇返電訊公司寄畀你嘅賬單，明明個Plan有每月2000分鐘通話時間，但你只係用咗唔夠200分鐘；數據只係包2GB ，你就用到4GB，畀人罰錢罰到想喊……不過，而家周街都有WiFi咁方便，只要節制少少，都唔會話爆Data。但就因為數據太方便同免費，你會做出好多不必要嘅壞習慣。
之前Send SMS要逐次計，你一定會好有文有路打晒成段嘢先寄出，邊似而家打句嘢都支離破碎到要分三次寄，仲要夾雜兩個Emoji……最慘對方用錄音功能錄一句說話都要分三段，每次講幾秒，真係好煩，甚至乎有人邊錄邊傾兩粒鐘都得，咁點解唔直接打畀對方呢？
咁錄音功能係有佢獨特優點嘅，好似你搭車時大大聲傾電話，嘈到其他乘客就唔好啦，呢個時候錄音功能就幫到你，斷斷逐逐發出聲浪，應該唔會畀人側目啩？另外，錄音係可以反覆聽好多次，例如上司落嘅「柯打」，細味三次，包保唔會做錯嘢啦！又或者，男朋友女朋友嘅留言，可以永久下載保存，萬一分手都可以留個紀念吖嘛……傻啦，留低罪証就有份！
十年後，科技又唔知會發展到咩地步，到時智能手機會唔會變成超智能手機，又或者有冇其他裝置係有通訊功能，可以取代到電話，玩埋腦電波心靈感應，都係未知之數。唯一可以肯定嘅就係，「2」字頭嘅屋企電話號碼，將變成一堆數字歷史遺蹟，或者被重整合併，成為大家嘅集體回憶……
Facebook專頁：大雞小事（https://www.facebook.com/bigchickenlittlethings ）
特別鳴謝插畫師：「Nothing Serious」（https://www.facebook.com/nothingseriousfans ）
2015年6月18日星期四
壹週Plus｜Next Plus｜專欄
订阅：
博文评论 (Atom)
没有评论:
发表评论