隔牆有耳： CCTVB惡搞誠哥曲線撐狼
2012年03月17日
- CCTVB噚日晨咁早就搵記者守候李嘉誠，趁佢打完波上車前問佢點睇特首選舉。唔知係記者太興奮抑或太是旦，新聞報道字幕竟然將誠哥稱為「祥」實集團主席。
有網民玩嘢，話 CCTVB呢一次都算為網民「着想」，慳番大家唔少改圖惡搞誠哥嘅時間；亦有人反問，「祥實集團」其實係咪誠哥新收購返來嘅公司？唔知係攝影角度問題，定係相由心生嘅關係，唔少網民話噚日無綫影到嘅誠哥，個樣好似早前被亞視誤報離世嘅前國家主席江澤民喎。論壇宣傳似梁競選口號
長實變祥實？唔通要配合誠哥噚日嘅祥和樣？無綫電視畫面
無綫惡搞完唐唐頭號支持者誠哥之後，更加公然曲線挺狼。話說近日佢哋宣傳噚晚嘅特首候選人論壇時，竟然喺宣傳片上用上「七百萬人齊心見證」做宣傳。
稍為熟悉狼振英競選工程嘅人都知，狼生競選口號為「七百萬人是一家」以及「齊心一意撐香港」，狼生除咗成日將「七百萬人」掛喺口邊，更將「齊心」扣針掛在心。無綫咁多字唔揀，係都要用呢幾隻字，究竟係咁啱得咁橋，定係因為預示狼振英獲欽點後贏梗，所以率先擦定鞋挺狼？八方唔敢亂估，留畀市民自己判斷。
没有评论:
发表评论