富臨漁港搵笨 龍蝦夾雜蟹柳 - 20120525 - 蘋果日報

 

富臨漁港搵笨　龍蝦夾雜蟹柳

2,888元的芝士龍蝦伊麵只有六件龍蝦肉，且混入人造蟹柳。讀者提供圖片

【本報訊】大酒樓以蟹柳充龍蝦？富臨集團旗下酒樓加入人造蟹柳煮芝士龍蝦，有食客點吃一碟單價2,888元重4斤12両的生猛澳洲龍蝦，上碟只得六件龍蝦肉。食客不滿偷工減料，店員竟稱人造蟹柳乃龍蝦腳肉，被質疑偷龍轉鳳以平價蟹柳換走貴價龍蝦肉。
母親節當日，陳太一行18人到黃大仙新光中心富臨漁港晚膳，先點一個4,888元套餐，再經部長介紹加點一味芝士龍蝦伊麵，職員從魚缸撈出一隻4斤12両重的澳洲龍蝦。

陳太在黃大仙新光中心的富臨漁港消費8,000多元，換來一肚氣。梁御和攝

2888元僅六件肉

陳太說：「碟龍蝦上枱，有四個人每人夾咗一件，發現淨番兩件，啲蝦腳全部係空嘅！」部長當時更指鹿為馬，稱混在龍蝦的人造蟹柳是龍蝦肉，「佢指住啲蟹柳話師傅將蝦腳嘅龍蝦肉捅晒出嚟，當我傻㗎，明明係一條條蟹柳，仲話係龍蝦」。
其後店長又解釋指加入蟹柳是法式煮法，一名穿着廚房制服的人幫口說劏龍蝦時已發現龍蝦冇肉。陳太怒說：「既然發現冇肉，點解唔通知客人？啲蝦殼好乾淨，連衣都冇，懷疑係人哋食過洗番乾淨再煮畀客食。」
陳太支付8,223元餐費後憤然離去，富臨集團收到投訴後承諾兩天內回覆她，但沒有兌現承諾。
記者到黃大仙富臨漁港，姓顧經理強調並無欺客，又稱芝士龍蝦伊麵一向加入蟹柳同煮，更指澳洲龍蝦頭大身細「冇乜肉」。秤龍蝦的楊師傅則指蟹柳可帶出芝士味，「一斤龍蝦得幾両肉㗎咋」。
名廚周中稱從未聽過芝士龍蝦伊麪加入蟹柳，大嘆「有冇咁搵笨」，「除非碟嘢唔夠龍蝦肉，要混啲蟹柳落去等個客多啲肉咬吓，咁我就理解。賣成2,888蚊一碟龍蝦，除開成600蚊斤，屬貴價貨」。
另一名廚黃永幟也對加入蟹柳的做法大感詫異，他指人造蟹柳由不同魚肉合成，「龍蝦嘅味已經好夠濃，蟹柳本身冇乜味，我估係想托起碟餸賣相好啲，博啲客唔識啩」。他稱4斤半龍蝦可斬件成10至12件，連同伊麵底夠15人吃。
富臨集團發言人稱，芝士龍蝦加入蟹柳碎是要「吊味」，碟中有多條完整蟹柳則是師傅刀法及技術問題，「可能隻龍蝦喺養缸嘅時間比較長，肉開始削。我哋喺客人面前即撈即磅即炒，冇可能偷工減料」。

富臨漁港搵笨　龍蝦夾雜蟹柳 - 20120525 - 蘋果日報