內地新「奸」作 售價$880 蘋果黐樹扮年花
強國新奸作 蘋果黐樹
【本報訊】年近歲晚，巿民忙於買年花辦年貨，旺角花墟不少店舖今年從內地引入紅噹噹的蘋果樹當年花出售。有主婦以880元購買一盆回家後，懷疑蘋果樹是「移果接木」的黐膠水產品，與職員聲稱是自然生長不符。有關花店負責人聲言只是憑相入貨，沒加以考究，強調無欺騙顧客之意。
記者：張珮琪 梁偉權 梁琬珊
家庭主婦李女士（圖）的女兒得知有花店出售蘋果樹，覺得作年花新奇有趣，上周六母女行經花墟一間花店，見有蘋果樹售賣，大盆1980元、細盆980元，李婦詢問職員：「係唔係黐落去㗎？會唔會買到返去甩晒㗎？可唔可以擺到過年？」她指職員回應稱：「點會黐上去呀，下面有根㗎。」李遂揀了一細盆有16個蘋果的，講價至880元成交。
■該蘋果樹賣了880元，但蘋果卻疑是黐上去的。梁瑞帆攝
塗油漆遮破口
回家後李女士拆下包裹蘋果的膠袋，果香撲鼻，「但睇睇下奇怪蘋果好貼樹身，太茂盛」。且發現樹枝有膠水及疑似啡色油漆迹，她遂剪下樹枝解構，發現蘋果椗插入樹枝內，疑有人在樹枝鑽小洞，將蘋果椗插入，灌膠水固定蘋果，然後塗上油漆遮蓋破口。
李不滿道：「買番嚟係買培植員種植嘅心血，唔係買DIY嘅手藝，本身唔值𠵱個價錢嘅?賣到咁貴！如果你話我聽𠵱個係假嘅，我有權決定買唔買；但你冇講到，當佢係原樹生出嚟，同黐落去係兩回事！
記者日前到有關花店查詢，姓鄭老闆娘表示：「我唔識種，淨係識賣，見過相靚咪入貨喺大陸運過來，成個花墟都係咁賣，我唔係呃人嘅！」她稱首次賣蘋果樹，賣了約一個月，強調之後會向客人表明：「啲蘋果可能唔係呢棵樹生嘅，啱你就買，覺唔值得嘅就唔好買喇。」她又稱不敢再入貨，日後取貨亦會小心查問。
有訂了蘋果樹來取貨的巿民表示，無考究蘋果是否原樹生出，亦不介意是後期加工，「咁細棵樹唔會有咁多蘋果，買返屋企過年當裝飾。」
香港鮮花盆栽批發商會主席賴榮春表示，蘋果樹是今年才普遍由內地引入本港當作年花出售，他不排除運輸過程中蘋果掉下，有人將之黐番上去。
■剪開樹枝，可見裏面鑽洞插入蘋果椗。
■樹枝插着蘋果椗，周圍似有膠水迹。
没有评论:
发表评论