金手指：人行為乜令息高 - 孫柏文
■如果人行妥協放水令拆息回落，港股或者大彈。 路透社
兩日前，喺小Deep V迷你「大奇蹟」發生之際，孫柏文見到前港姐王卉霖喺fb轉載咗微博呢段說話，「僅僅幾天之間，經濟崩潰的聲音驟然響起，銀行間資金流枯竭，央行又不願出手，一片風聲鶴唳，很多人問這兩天金融市場到底發生了甚麼，為甚麼一夜之間突然會這樣？」
我見到就即刻留言話：「小妹，08年，妳入行未呀？」留言後，我就諗番起Bear Stearns，雷曼爆後，啲人傳摩根士丹利係下個爆嗰刻。諗冇一分鐘，佢立即回言：「真係好開心你叫我小妹呀！」
港股睇住拆息走
點都好，去到噚日晏晝，成個市場好似已經達成共識，天下之央行將會再鬆手。例如，花旗國嘅聯儲局，就喺伯南克話「先減速，再剎停」後，就有個聯邦儲備銀行分行經理出來補飛話減慢都冇咁快。
當然，仲有人行話會留意大陸銀行同業拆息，咁啲隔夜息率，就由希臘嗰個水平落番來，雖然拆兩個禮拜先還嘅錢，啲息仲升緊，不過個個話喺6月尾銀行達存款要求後，所有年期嘅銀行拆息就個個有得回落。即係捱埋呢個禮拜，息口會見頂，銀行拆息甚至可能已喺幾日前見頂。如果大陸銀行真係拆息見頂（起碼如果市場係咁吹的話），又有聯儲局嘅人放風聲退市會有排，咁之前二萬二點嘅高位應該會短期內見番。之前質到飛起嘅股，噚日已經要追，今日上番車就要快。
要彈返上二萬二當然有隱憂，𠵱家好似啲央行不再企硬，又回印鈔時。我始終覺得人行為冇「迷債苦主」，一定要令大陸shadow banking乾塘，最好方法，就係一招推高銀行拆息令資金湧返入銀行。
所以，睇吓下個禮拜究竟大陸銀行拆息係咪真係回番落四厘，係就二萬二見，如果唔落，就彈完再跌。
孫柏文 獨立股評人
没有评论:
发表评论