靚豬肉要具備甚麼條件？「新鮮豬肉通常肉色鮮紅、有光澤；表面要有彈性，水份高，質感較腍，具有鮮豬肉特有嘅氣味。」華記農場大致分為黑、白豬種兩條生產線，「黑豬較美味、豬味濃，我哋啲白豬會加入黑豬基因，所以黑白豬肉質相差無幾。」 Charles推介黑豬五花腩片，「我哋成功調配出黑豬有明顯嘅脂肪雲石紋，唔使落任何調味，打邊爐食最好。」
豬位一覽
1.脢頭肉
去骨膊頭肉，肉質細膩，帶少許脂肪，宜做肉餅、叉燒。$175/千克
2.西施骨
因扁平如扇，又名扇骨，骨頭鬆軟，肉多無肥脂，宜煲湯。$135/千克
3.飛排
又稱肉排，肉質腍，蒸排骨最好。$180/千克
4.一字排
俗稱金沙骨，為肋骨連肉，肉質飽滿肥美，宜做京都骨。$150/千克
5.柳脢
脊骨與大排骨相連的瘦肉，因運動量少、脂肪少，口感最嫩。$180/千克
6.髀赤
取自豬腿、臀的肌肉，肉質細嫩，脂肪含量少。$130/千克
7.五花腩片(火鍋)
見到脂肪與肉分四層相隔，入口即溶。$200/千克
8.豬手
為豬前腿，皮厚、膠質豐富，品質較豬腳佳。$100/千克
9.豬頸肉
面頰至下顎間的肉，看似肥瘦混雜，其實脂肪含量不高。$210/千克
華記農場銷售點
地址：西灣河街市地下M12號
倒三角好身材 靚豬食蟲草
越來越多人重視食材健康，連尋常的豬肉也講究
無添加。要食有機名種豬，不一定要用外國貨，在這元朗
八鄉的豬場，約有3,000隻豬，他們的祖先皆來自英國
西南部地區巴庫Bath，他們的移民故事是這樣開始的……
記者：何嘉茵
攝影：劉永發、蔡家輝、潘志恆
純種巴庫豬 混種土炮
甫踏進華記農場，沒想過迎接我們的卻是位戴着金絲眼鏡、一副學者模樣的男人──陳武池（Charles）。他是這個農場3,000隻豬的主人，除了是生物化學工程師，還取得環保學博士學位。別人嫌養豬辛苦又有臭味，他卻視之為興趣。「當時喺英國返嚟，諗住周末打發吓時間，繼承爸爸嘅農場並改建為豬場，自己讀生化出身，養豬可以觀察其生長周期，正好有個實踐機會。」在籌備過程中，卻非一帆風順，「原本係養本地豬，但豬種唔夠優質，出現好多問題。做做吓覺得與其係做，不如做到最好，仲要做無香港人會做嘅嘢──用純種豬自行混種，培育出有本土特色嘅豬種。」
他由零開始，遍尋歐洲農場的優質豬種。「英國南部氣候較溫暖，同香港好似，所以就喺巴庫買入七個豬種、共89隻豬返嚟。」全世界有逾400款豬種，每種豬均有不同特點和個性，「好像皮特蘭（Pietrain）屬肌肉型，但好細膽，好易嚇死；杜魯克（Duroc）肉質肥美，呈雲石脂肪紋；英國野豬（Wild Boar）適應力強；銀帶（Hampshire）則各方面平均，母性強……」 Charles如數家珍地說。小記隨他進入豬場，參觀前須穿上全套防護衣，只見豬按不同年齡分開飼養，有紅色、黑白斑點、黑色等的混種豬。可惜，因純種豬容易受驚，故未能進入該區域參觀。
■Charles由農場送到肉枱均採用一條龍服務。
■約三個月大的小豬。
■混種豬會出現不同的色澤。
■已混種的黑豬（左）的膊頭肉明顯較白豬肥美（右）。
■豬的飼料由農場自行配製，講求天然。
■豬的耳背有獨立的身份號碼。
餵蟲草粉增免疫力
現時農場推出的豬隻，每隻至少經過四代混配。Charles分享混種心得，「豬要混種先好食，但唔可以將外國嗰套混種方法照辦煮碗咁搬過嚟，好似喺歐洲，豬嘅後髀較值錢，豬多數呈三角形；香港通常係脢頭肉最貴，所以豬嘅膊頭位最緊要肥，而港人又鍾意食較腍、肉味濃嘅豬肉，如果自行混種，符合到市場需要之餘，亦改善到豬嘅不良基因。」
雖然有機豬成本高昂，價錢較一般豬貴約兩至三成，但Charles坦言對有機豬業很樂觀。「我哋比其他人行先咗好多步，好似送到肉檔賣嘅豬，全部有配種紀錄及獨立嘅身份號碼，萬一有問題，我哋可以追蹤到原因。」不少內地豬場為節省成本，用化學飼料或餿水餵豬，但華記的豬，食的是天然飼料，包括黃豆粉、粟米、麥糠等，不含催生劑。「食黃豆粉可增強肌肉、粟米提供熱能、麥糠有飽肚感，我會自行調配飼料比例，如果切開豬肉後，發現該批豬嘅肌肉唔夠，就會增加黃豆粉嘅份量，冬天會加入蟲草粉，增加豬嘅免疫能力。」
没有评论:
发表评论