中環人語
誠哥周身科技武器
誠哥八十五歲人，依然走喺時代嘅尖端；繼早排紅爆面書嘅 Bitstrips後，佢最近又透過由紅顏知己周凱旋打骰嘅維港投資，夥拍其他基金，投資逾億港元落美國公司 Misfit Wearables。依間公司專生產集運動追蹤同計算運動量功能嘅「 Shine」，全球勁收廿萬張訂單。
睇番維港投資嘅 Portfolio，絕對係唔潮唔玩，早年已經投資面書、 Skype同 Siri，一一年又率先注資超過廿五萬美元喺一個叫 Summly嘅新聞摘要 app，今年此 app被 Yahoo!睇中，以三千萬美元收購，年僅十七歲嘅創辦人達洛伊西奧（ Nick D'Aloisio）仲同時被 Yahoo!羅致。佢點名多謝誠哥，話佢有遠見，支持一個年輕人完成夢想喎。而維港共五十二個投資中，無個係香港，香港青年想多謝誠哥就無機會啦，佢只留番「李氏力場」俾大家慢慢歎！反而喺以色列就有二十一項投資，皆因維港管理團隊中，現為科技總監嘅 Gilad Novik，係居英嘅以色列人，九九年已幫誠哥打理英國橙。有佢做盲公竹，誠哥就可以將投資重心擺到無雷公咁遠嘅以色列。
除咗玩 apps，誠哥仲有新玩意── Big Data，即係用電腦分析海量數據嘅技術，從而預測天氣，甚至為病人斷症。今年九月，誠哥就投資咗三百萬美元落 Meteo-Logic，嘗試用 Big Data技術嚟分析天氣。咦，唔知對加強「李氏力場」，有無幫助呢？壹計就明 景福「調無可調」
本欄找來有二十多年經驗的資深會計師林智遠及鄔碩晉，每期踢爆一間上市公司的會計陷阱，股民入市前睇清睇楚，一計就明。
景福（ 280）最近公布中期業績，虧損 7,820萬港元（下同），管理層解釋由盈轉虧，是因消費意慾和購買力減弱，市場競爭激烈，令毛利率下降。不過，同期六福（ 590）及周大福（ 1929）的營業額和盈利卻大幅增長。分析業績時，相信管理層，不如相信數據，與同業比較是簡單可靠方法之一。
景福毛利率由去年 27%，下降至今年 24%，對比六福的 20%或周大福 26%，並非偏低。但景福分銷及銷售成本和行政開支，卻共佔收入 37%，對比六福的 10%和周大福的 15%，明顯超高。去年中期和年結，景福相關成本也達收入 37%及 35%。試問 100元收入賺 24元毛利，又怎支撐 37元開支？
入不敷支，過去景福便靠其他收入。去年出售物業、機器及設備帶來 9,506萬盈利，「出售可供出售投資時之重新分類調整」帶來 7,270萬盈利，年度溢利卻僅 4,909萬。類似情況出現在 2012年度業績，投資之「重新分類調整」帶來 8,405萬盈利，年度溢利也僅 3,535萬元。
投資之「重新分類調整」，實際上是會計調整，投資的增值不全是該年產生，而是可能在出售前，已經過很多年累積入賬；出售後，只再次重新分類該增值，調整為盈利。
無論怎樣，過去兩年，景福都要靠上述會計調整，來化虧為盈。但在今年，資產負債表中可供出售投資，也只剩數百萬，會計調整做了也沒有效果，虧損也就轉化不成盈利了！
試問，景福數年來有否正視一直入不敷支的困局？有否尋找解決方法？還是年年透過會計調整，去化虧為盈？去隱藏困局？問題還包括，當景福主席也指出「業績差強人意」之時，景福卻大幅增加董事及主要行政人員酬金和關連人士顧問費 43％，由 2012年 943萬增至 2013年 1,347萬，這又是否合情合理？（林智遠）郭炳湘話嬲到震
新地（ 16）郭老太（小圖）喺十一月尾，將家族信託中由郭炳江、炳聯及其家人的持股，部分分派入另一個信託，意味佢兩個「大個仔」啦，可以喺處置股份同股息上，自己話吓事。咁，今年六十有三嘅大哥炳湘呢？就梗係無呢份大禮。雖然郭老太話，郭氏三兄弟呢三房人嘅權益依然均等，但，未分出嚟，就即係未落到袋啦！郭炳湘發言人話，水哥今次嬲到震，非常不服，尤其佢家人應得嗰份權益，喺港交所仲未見披露。話晒郭老太都八十有四，不幸有咩三長褲短，最怕批股份凍過水！
近年，作為大佬嘅郭炳湘無份掂屋企生意，不過係都估唔到郭老太連家族股份都無俾佢啫。（張國慶攝）
本週監察成功
第 1238期《壹週刊》，小宗發現調景嶺翠善街斑馬線，地下啲字叫人望左，箭嘴卻叫人望右，搞到人神經錯亂（小圖）。事隔兩星期，改番啱啦（大圖）。知錯能改，善莫大焉！不過上期提及有大量英文錯字嘅路牌，就未改噃。上期無寫喺邊，小宗俾個 hint，個牌屹立於油塘高超道呀。下期再跟！
（陳浩樂攝）
金牙大狀講嘢 階段性成果：食蛋
一次掟唔中，唔等於永遠都唔使
食蛋㗎，老友。
（羅國輝攝）一個月前，「一男子」向菲律賓政府下哀的美頓書，話一個月內冇「階段性成果」，即採取制裁行動。家吓一個月之期已過，有乜「階段性成果」?學得林鄭話齋，「不言而喻」，即係通通齋 talk。
眾所周知，家屬對菲律賓政府有四項嚴正要求，包括政府道歉、作出賠償、懲處犯錯官員，以及確保類似事件不再發生。請問「一男子」，一個月來，阿基諾政府就呢四項要求，做咗啲乜呢？有乜「階段性成果」呢？如果冇，咁「一男子」又採取咗啲乜嘢制裁行動呢，又？學得林鄭話齋，同樣係「不言而喻」。
大陸幹部冇料到，永冇後果。莫非因為咁，「一男子」講嘢就喜作「方方面面」、「階段性成果」之類嘅強國腔？佢千祈唔好忘記，「一國兩制」，喺特區尸位素餐，淨係識得口噏噏，係會俾人饗以雞蛋者。一次誤中副車，唔等於次次都掟唔中㗎，老友。聖誕送大禮 呢度有幾多隻吉祥獸？
不少行業都會在鋪頭門前放上吉祥獸，辟邪保平安。大家最熟悉的，一定是獅子銀行門口的一對銅獅子。這對銅獅子，自 1935年便「守護」着滙豐，而且「有名有姓」，張開口的叫史堤芬，取名自 1920年時任香港總行總司理的史堤芬（ A. G. Stephen），他亦是倡議鑄造銅獅子的人。另一隻叫施迪，取名自當時上海分行經理施迪（ G. H. Stitt）。在中環其他銀行門口，亦擺放了不同的吉祥獸。
有獎問題：金鐘紅棉路至中環永和街中間（地圖圈示），現有幾多隻吉祥獸（包括滙豐銀行門口的兩隻獅子），擺放在銀行門口？
玩法：有意參加者，請於十二月二十日 19:00前，把答案、姓名及聯絡電話電郵至 centralman@nextmedia.com。小宗只接受電郵，郵寄免問。如多於一人答啱問題，將抽籤決定得獎者。答案及得獎名單，將於 1242期《壹週刊》公布。
規則：
小宗只接受電郵，郵寄免問。
每位參加者只可參加一次，作答多於一次者取消資格。
超過一位讀者估中，將由專人抽籤決定，不得異議。
答案及中獎者姓名，將於 1242期於本欄公布。獎品總值$15,808元
1.J-33藍寶石鏡面限定版手錶一隻 HK$4,980
2.J-37尊貴版藍寶石鏡面限量版手錶一隻 HK$4,980
3.J-37水晶版藍寶石鏡面限量版手錶一隻 HK$4,980
4.PlexEasy多功能外置 DVD燒錄器一部 HK$399
5.CL51外置充電池一個 HK$349
6.C260E耳機一個 HK$120上週人語揭曉答案
“你只有一條大路，遠走高飛，不然你下場將是可悲的。”
李嘉誠
得獎者： Ivy Kwan
中獎時間： 1:00pm 4/12/13廣告時間
你有某財團嘅黑幕想爆？你知邊間上市公司造假？
你仲想舉報地產霸權嘅不公？
歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！
爆料熱線/whatsapp： 6829 5929
没有评论:
发表评论