金像特效導演製作兩月
徐悲鴻駿馬動起來
■黃宏達將國畫大師徐悲鴻四幅駿馬畫作，變成長一分鐘嘅動畫。受訪者提供圖片
國畫大師徐悲鴻筆下駿馬栩栩如生，意形神態俱備。透過動畫科技，畫中神駒更加可以活現眼前。曾奪金像獎同金馬獎嘅數碼特效導演黃宏達，花咗兩個月時間，令徐悲鴻四幅水墨畫嘅駿馬「動起來」，製作成短片故事。
黃宏達獲賽馬會邀請，將徐悲鴻四幅作品《立馬》、《奔馬圖》、《大奔馬》及《雙駿》，轉化成動畫故事，做新春賽馬日嘅廣告片。上「精讀班」掌握神髓
佢話，要將水墨畫變成動畫短片，首要工作係掌握畫家筆法同神髓。整段短片製作咗兩個月，佢話水墨畫唔同油畫，要認識墨水去到宣紙有乜嘢效果。徐悲鴻藝術委員會嘅專家又特別開咗「精讀班」，等製作團隊認識徐悲鴻畫作細節。黃宏達大讚，徐悲鴻畫嘅馬都係好醒，從馬肢體、項背鬃毛同馬尾形態，整隻馬神態都有喜悅嘅感覺。
前期資料搜集花咗兩周，緊接兩周就要將平面駿馬立體化，過程好似考古學，執到嚿化石，要好好想像吓點樣重塑物件原型。黃宏達曾將徐悲鴻作品同十數匹馬嘅照片，仲有解剖用馬匹結構圖對比，發現徐悲鴻筆下嘅馬，骨骼肌肉結構同真馬非常脗合。
最後階段就係將馬「動起來」，要將水墨國畫動畫化，又要貼近真迹。佢請教馬會專家，知道馬匹最佳跑姿，快馬嘅前後腳角度要呈105°。佢話，今次經驗激發佢研究水墨畫立體化嘅興趣，因為墨水喺宣紙上，顏色濃淡千變萬化，有一套獨特美學。
■黃宏達將國畫大師徐悲鴻四幅駿馬畫作，變成長一分鐘嘅動畫。受訪者提供圖片 
■黃宏達話將水墨畫變成動畫，首要係掌握畫家筆法同神髓。 
徐悲鴻作品《大奔馬》 
没有评论:
发表评论