壹週刊 - 1247 - NEXT 3.0 超薄充電

 

@周群雄

1800mAh嗰款 size同張信用卡差唔多大，但就得 6.25mm咁薄，最適合用嚟做應急後備電。我就比較鍾意 5000mAh呢款，首先電量夠實用，而且只係稍稍厚少少（ 7.5mm），仲薄過 iPhone 5c，賣$238，好抵玩。

七彩高度計指南針戴上手

手錶有高度計同指南針，一啲都唔奇， G叔、 Pro Trek、 Suunto已經出到唔知第十幾代，不過，今次要俾 Like嘅係，「輸到暈戴星辰」嘅星辰（ CITIZEN） ALTICHRON。屬 Promaster系列，「可以顯示一萬米高度」，一萬米，點計都去唔到喇，唔重要，有朝一日可能用得着都未定；有指南針功能，睇住支針慢慢郁，過癮；七彩蝦條姐姐咁嘅錶面，睇相，好古怪，後尾睇實物，唔太差又唔反感；最欣賞，係條膠帶，好軟熟，好貼手，係有少少易黐塵啫。定價七千三，有少少嚇人，不過，係有折嘅，幾多？最好格多兩間價。

好花嘅錶面設計， OK，淨睇白色嗰兩支針就知時間，其他嘅針，當係裝飾當係 bonus。

@劉定邦

彈出新血路

就算第一隻出嘅手機 game多人玩，都未必代表第二隻一定成功，最經典例子非 Rovio推出嘅《 Angry Birds》莫屬。至於好出名嘅《 Puzzle& Dragons（ P&D）》開發公司 GungHo又點？最近呢間日本公司就推出咗新 game《 Monster Strike》，玩法同《 P&D》有七成似，又係抽怪進化，不過將轉珠攻擊系統，變成桌球式撞擊攻擊系統，連三歲細路都識玩，仲可以 online搵四名戰友一齊過關，變化大好多。咁到底好唔好玩先，介紹俾老婆大人之後，每晚見佢玩到唔停手，玩得仲密過我，就睇得出有幾高吸引力！睇嚟好快會成為另一隻必玩手機 game。

除咗直接攻擊，仲可以撞向同伴出友情技，自己隻怪物好弱，都可以搵其他人幫手過關。

＠勞耀全

點解冇橙色

一直對 Windows Phone冇興趣，一來系統比 Apple iOS更加自閉，二來又冇乜 apps用，所以就算 Nokia出咗幾部睇落唔錯嘅手機，最終都未幫襯過。最近 Nokia出咗部 Lumia 1320，今次有少少興趣喎，雙核心加 8GB內存，機能唔算標青，但個六吋 720p大屏幕都幾靚，又支援 4G上網，用來上網、睇書，當平板都唔錯。開價$2,998，三千蚊都唔使，比起同級嘅中階 Android手機，定價進取好多。不過，最吸引我嘅係「熒光橙」機身，夠搶眼，又靚，又襯晒我架車。點知香港行貨竟然只得黃、黑同白色，橙色完全冇影！即係叫我唔使諗，慳番。

強國都有橙色，唯獨香港冇。

@林勇

壹週刊 - 1247 - NEXT 3.0 超薄充電