越南舊事 | 蘋果日報 | 副刊 | 名采 | 20070517

 

越南舊事

講起法國餐，前輩賓架Ｌ話越南有法國飲食遺風，大家有時間可以到越南旅行試法國菜。越南正在學習中國，實行改革開放（政治上則拘捕民主異議分子），於是外資湧入，經濟興旺，香港工業界亦有唔少人到越南設廠。
南越被北越吞併前，冇乜老友去過南越（北越當然冇人敢去），賓架Ｌ在五十年代駐西貢，陣生活優游，銀行家梗係嘆世界到極啦。眨眼越戰打到南越散晒，本來好有法國情調，法國浪漫生活變成共產黨批鬥、清算、死亡，好多華僑傾家蕩產。
呢日聽見專做華僑生意廠商Ｋ講，現有越南華僑商人專門承辦政府清拆舊樓或買入舊樓重建，但只係對華僑住過舊樓有興趣，不惜低價投標。點解要做蝕本生意呢？有內幕，博一博，博中一兩鋪就對本對利。博乜呀？清拆舊樓舊房屋（獨立屋）之時，對拆牆特別小心，逐塊磚頭敲落去，慢慢拆，因為內有坤，可以博到頭獎，發現牆內有牆，藏一金條、珠寶、美元現鈔等等。戰亂之時，華僑富翁富商難分兵賊，好驚抄家，將家藏財富埋於圍牆內，但最後家人難逃一劫，於是遺物無人認領，益今日新發財。

左丁山一九九四年跟過商業考察團去胡志明市（西貢），當時市內舊樓爛樓多到不可勝數，所住酒店極為簡陋。某日大家坐旅遊巴經過堤岸（唐人埠），同行經紀Ｒ細細聲講：「左面間大廈係我老竇以前公司所在地。」原來經紀Ｒ在西貢長大，讀法文學校，好彩一九七五年之前，全家及時離開，避過一劫，但父親擁有大量不動產全部一筆勾銷，經紀Ｒ話：「舊夢不須記。」，記舊事，有時好痛苦。以前在球壇活躍貿易Ｔ有一位親戚留在西貢唔肯走，仲收留佢位公子一個好同學在家避禍。好，到越南統一，共產黨接管西貢改名胡志明市之後，某日公安人員到來抄家，帶隊就係兒子好同學，同學對全家秘密甚為熟悉，乜都充公晒。原來呢位兒子同學受組織遣派做無間道，從兒子身上套晒家庭秘密，北越兵入城就反面無情矣。

左丁山

越南舊事 | 蘋果日報 | 副刊 | 名采 | 20070517