�果日�- 跟着美�走 - 左丁山

2017特首普選候選人嘅資格，提升到國家安全嘅高度，幾嚇人，啲中央大員貪腐成羣，送子女到美國讀書入籍，唔知又算唔算係國家安全嘅議題呢？可能係啩，否則中央點會嚴打「裸官」噃。INYT報導，大量中國有錢人喜歡選擇紐約長島（Long Island）為家，投資移民取得入籍資格後，老公就留在上海搵錢，老婆就同兒子或女兒（只得一個）遷居長島，以二百萬美元買屋，安居樂業喎。當地一間地產代理講：「我地不能坐響度等中國人上門搵屋㗎，我地直情去上海開分公司，招攬啲投資移民客過嚟長島買屋。」點解要去長島？除咗係傳統中上住宅區以至豪宅區之外，還因為當地公立學校成績係紐約最好嘅，讀好書有保證囉！


咁多中國有錢人移居長島，形成新「唐人街」以至「唐人埠」，會唔會影響國家安全呀？美國NSA會唔會更容易監聽上海與長島嘅電話電腦通訊呀？中國中央處處防範國家安全，話香港人無國家安全意識，唔該政法委系統首先防範，勸阻有錢人移民美國先。


美國好鬼衰，影響力無處不在，例如搞一個冰水照頭淋，都可以吹襲到香港，高官富豪無不上鈎，與美國人癲埋一份。冰桶裝水裝冰照頭淋，在美式足球決賽，無論係大學或NFL超級碗，係例牌節目，贏到嘅冠軍單位隊伍在完場前早已準備好，完場後就偷偷地（其實教練老早心裏有數）走埋教練身後，成個桶淋落去，因超級碗在一月尾舉行，時值天寒地凍，教練俾冰水淋頭確係凍到入心，身體差啲，惹上肺炎都唔奇。呢個玩法，好典型美國式，傳到嚟香港，30度大熱天時用小水桶淋吓自己，小兒科到極，但美國人透過互聯網宣傳，加上溫馨愛心（捐款ALS），就足以令香港名流、高官、藝人玩埋一份，聽從美帝文化指揮棒活動，你話美國影響力係唔係無處不在，梁振英疏於防範先？再講嚴肅嘅，香港所有媒體所用嘅國際新聞，無一不取自美聯社、路透社、杜瓊斯、彭博、紐約時報等等，根本係跟着美帝走，人家有不怕死慷慨就義嘅戰地記者，前仆後繼咁去地球最危險嘅地方採訪新聞，中台港三地有冇如此英雌好漢呀？中台港之世界戰地新聞，全係繙譯，學乜人講新聞話語權？此中終極原因就係因為華文媒體最大市場在中國大陸，媒體受一級控制，了無生氣，中國市場承受不了華文CNN、華文紐約時報之故！