�果日�- ��酒 - 左丁山

買紅酒 - 左丁山

張總在校友會午餐會講中國靚酒，Jancis Robinson大讚嘅2009年「賀蘭晴雪加貝蘭特別珍藏」（Helan Qing Xue JiaBeiLan Grand Reserve），香港難以搵到，在上海或可買到。在座嘅陸錦榮老友阿豐哥聽見，立即微信到上海通知好友去外灘名店搜尋，如果買得到，請埋左丁山，陸錦榮飲杯咁講，呢隻酒售價約在一千至千二元人民幣左右，但以過往內地慣例，真正上品的靚酒，無論紅酒或茅台，必然有醒目商人係咁買，送上北京做貢品，能流入民間店舖的少之又少，是故一樽難求。或者今年打貪腐運動雷厲風行，啲「貢品」會從不同渠道流到上海都未定。豐哥來自天津南開大學，同班同屆同學中不少早已下海發達，皆在京津滬有營商網絡，故此豐哥話搵到2009賀蘭晴雪嘅機會係有嘅。


張總講佢在意大利飲一隻Barbaresco（D.O.C.G.）售一千二百港元（折合匯價）左右，但佢未上酒樓參加校友午餐例會之前，先到Fusion（超市）一行，睇睇紅酒價錢，竟然發覺有隻Barbaresco（D.O.C.G.）竟然只賣港幣一百四十元左右，以為自己眼花㖭，或者係意大利稅金太高？買意大利酒最緊要在招紙上有（D.O.C.G.）呢四隻字，有啲只係寫D.O.C.三個字，價錢就低啲嘅嘞，G即是garantita（即英文guarantee）有品質保證咁解，法國酒就要睇有冇A.O.C.。


係唔係Fusion嘜錯價錢呀？午餐過後，大家拜拜，趕住返工，左丁山靜靜雞運路行，走落酒樓下面嘅Fusion想話執番支平貨，點知已見到校友笑騎騎咁揸住支Barbaresco 2009（Ricossa）去付款出口，佢話：「你行遲一步咯，架上只有兩三支，俾我地校友掃晒！」冇法啦，執輸行頭就落得如此！於是順路行去太古廣場嘅Great，睇吓可否搵到呢隻酒，點知行吓行吓，撞到餐廳R，話俾佢聽搵緊Barbaresco，餐廳R話：「唓，我代理不少Barbaresco嘅不同牌子，後日送貨俾你，你要幾多！」俾佢拋窒，只好話要一支咁大把。跟住收到Euro Treat黎老闆短訊報喜，話佢間舖頭（史丹頓街口）出售嘅一款西班牙酒Mayor de Castilla Crianza 2010，贏咗今年在會展舉行嘅House Wine Award之金獎，過去五年黎老闆間Euro Treat一共贏咗四個獎項，都算佢識得揀西班牙酒入貨咯。

HH