尊子爭普選 「可比入獄更入肉」
【本報訊】本地著名政治漫畫家尊子隨「佔中三子」自首。跳出四格漫畫框走到佔中前線，由商討、遊行、剃頭明志、佔領到自首，他憶述當初在港台《香港家書》給兒子寫信，「話阿爸會去佔中，一定程度係一個承諾」，對兒子，亦是對香港下一代的承諾。談到自首承擔罪責，他以一貫輕鬆幽默語氣說：「如果能夠做到嘢、有作用，入獄都唔係問題，比入獄更入肉都可以做到。」
記者：陳雪玲
■在金鐘佔領區的眾多藝術品中，尊子對「百家傘」（上圖）印象最深刻。李家皓攝
與尊子的訪問在金鐘清場前進行。他說，過去傳過幾次清場，要看的、感觸的都看過了、感受過了。雨傘運動兩個多月，無力感不時湧現，會反問：「做咁多嘢有冇用？畫多張畫又點呢？唔知下一步點行，吊住喺度，好似身體器官全部倒轉咗。」談及清場，尊子有另類見解：「睇住佢冇，都係一個過程，一個藝術過程，𠵱家冇唔等於消失，係等於行下一步，你要留下腳印先可以行一下步。」
他自言，追隨三子自首，某程度上是出於對他們對民主運動付出與犧牲的敬意，同時「快手啲，做完一步到下一步」，之後可以多組織、搞活動、到學校接觸年輕人，用軟銷手法為民主播種。他以茶餐廳作喻，A餐叫堅持，B餐是投降，C餐叫自首，還有DEFG餐，「你揀咗A餐，但唔會鬧食BCD餐嘅人」。
「點解香港冇艾未未」
尊子參與佔中，始於年前與一眾漫畫家舉辦「漫人迷普選」展覽，之後搞商討日、幫忙設計宣傳，「一路打壓聲音越大，就越覺得要參與多啲」。
去年9月底，他在港台《香港家書》向「老豆」與「阿仔」交代為何佔中，其中一句這樣說：「點解香港冇艾未未嘅？有就好啦，佢咁想出風頭，我就匿埋喺屋企畫畫。維權呀、爭普選呀嗰啲嘢，就由『香港艾未未』去搞，各盡所能吖嘛呢啲就叫做。點知我等呀等……等呀等，等極都冇嘅喂！唔對路喎，所以不如自己行出來，否則隨時連渣都冇。」他說，香港還未有艾未未，大家在comfort zone「勒住勒住」，反而比不上內地維權人士、藝術家站得前，去得盡。
而一場雨傘運動，對本地藝術家影響深遠，令藝術與社會連繫起來。他說，藝術與廣場結合，最令他印象深刻是金鐘海富中心往添馬公園橋上的「百家傘」裝置藝術，傘幕用9.28擋過催淚彈、胡椒噴霧的破爛傘子組成，「見證方面強烈，視覺效果出到，籠罩式……經過下面，天空嘅顏色都唔同，成個氣氛都唔同咗」。
縱然無力卻心存希望
尊子筆下的漫畫道盡政權如何打壓普選，縱然無力，卻心存希望，「永遠有希望，如果冇希望就無謂做，做人都費事做，睇番國內朋友咁艱難都繼續做，艾未未俾人打壓得咁交關都繼續做……有能力，能夠做都唔做，希望只會更加細」。
上一則: 習近平周五訪澳門 社運人士遭監視
下一則: 三任特首 梁振英最難畫
I
没有评论:
发表评论