平玩紅米2 豪買小米Note
拜過年、食過糖，接下來當然要拆利是啦！相比其他品牌，小米零舍積極，人家收爐等過年的時候，它卻搶先引入兩部新機，等大家斶完利是買禮物！高階版小米Note底面均用上玻璃材質設計，手感豐富滑溜；入門版紅米2則支援雙卡雙待4G功能，顏色多感覺young，炒價分別約三千元及一千元。平貴任你選，睇你利是多與少！
記者：陳國輝
攝影：梁志永
小米、紅米分明各走各路，前者用料越來越靚，後者單純靠平取勝。值得留意的是，小米Note只有水貨，紅米2則有行貨，不過同樣炒到飛起。以16GB的小米Note為例，官網定價為人民幣2,299元（約$2,873），來港後索價$3,450；64GB版本則由人民幣定價2,799元（約$3,498）炒至差不多四千元。紅米2也不輸蝕，由$899炒至$1,050，升幅超過一成，究竟炒完一輪的小米還值不值得入手？真是見仁見智了。
用料頂級 價錢略貴
不論價錢，只求外觀及功能，小米Note的確有更佳表現。在旺角先達廣場開手機店的阿基，經常引進國貨，他說近年這類手機的特點就是價錢平、功能勁！「第一次拎起小米Note嚟玩，就感覺機身用料好頂級，例如玻璃面、金屬邊框，非常紮實。」他說，此機的整體感覺介乎iPhone 6與Samsung Galaxy Note 4之間，如果能以人民幣定價入手的話，應該可以熱賣！只可惜，首批抵港水貨已經炒至約三千五百元，「三千蚊以上又係另一條分界線，用家寧願選擇大牌子嘅中高階型號好過啦！」
■小米Note配備自家MIUI介面，並追加單手或大字體模式；機背採用帶弧度的玻璃面，觀感亮麗精緻。
試相
■小米Note在一千三百萬像素鏡頭及HDR加持下，畫質好sharp，「福」字尤其立體鮮明。
小米Note
主要功能：雙卡雙待4G、1,300萬像素鏡頭、5.7吋屏幕、S801 2.5GHz四核處理器、3GB RAM
顏色：黑、白
炒價：16GB $3,450、64GB $3,990
罕見！超平雙卡雙待4G
若小米Note超出預算，不妨考慮入門價的紅米2。阿基提到，近年較受歡迎的強國或台灣手機，大多是千零蚊、功能多，「例如華碩嘅Zenfone 6，配備六吋芒、1,300萬像素鏡頭同四核處理器，但兩千元有找。」另一特點，就是紅米2採用「真正」的雙卡雙待4G功能，非常罕見！他解釋，市面上很多平價手機均聲稱支援兩張4G卡，但實際上要切換使用，換言之，兩張SIM卡不能同時待機。至於膠質外殼、800萬像素鏡頭及4.7吋芒，規格只屬一般，但對售價僅千元的手機來說，已是超值吧！
■相比小米Note，紅米2的體積較為細小。
■不論是小米Note或紅米2，皆配置雙卡雙待4G功能。
■紅米2機身較厚，達九點四毫米，幸好顏色選擇夠多。
紅米2
主要功能：雙卡雙待4G、4.7吋IPS屏幕、800萬像素鏡頭、S410 1.2GHz四核處理器、1GB RAM
顏色：黑、白、藍、黃、粉紅
炒價：16GB $1,050
記者評測：相同規格G3仲抵
找來愛玩土炮的肥通測試新機，豈料遇上樣樣愛質疑的Apple粉絲史提夫，究竟二人對強國新貨小米Note有乜感覺？即睇！
史提夫：又話有指紋解鎖嘅？
肥 通：傳聞始終係傳聞，結果係咁都無法㗎，等下一部囉！
史提夫：但點解佢咁似iPhone 6 Plus嘅？
肥 通：強國機梗係左抄右抄㗎啦，反轉機背仲好似Samsung Note Edge𠻹！
史提夫：不過16GB都只係賣三千幾，都算幾平嘅！
肥 通：你畀我呀？LG G3規格差唔多，又有3GB RAM，平多一百蚊𠻹！
肥通評分：2.5分
史提夫評分：3.5分
5分為滿分
A-Grade 深水埗黃金商場地庫43B號舖
上一則: 養生：新年過後 草本消滯
下一則: 星座 - 芬妮
HH
没有评论:
发表评论