【潛龍碟影】愛你夠膠
農曆新年過咗成個月，港版藍光個市仲係好靜，碟舖老闆昌哥：「得套《翻生侏羅館》叫hit啲，個個都等四月兒童節同復活節，暫時最多人問嘅《Stand by me:多啦A夢3D》四月頭派碟，呢排都係靠日版同美版碟頂檔。」好彩，聽HKTV靚女PR話《選戰》boxset已經印製完成，嚟緊呢兩個禮拜，可以用高清翻煲全套十五集，睇吓電影級製作嘅電視劇有幾巴閉喇。昌哥推介剛拿奧斯卡最佳動畫長片嘅迪士尼3D動畫《大英雄聯盟》（Big Hero 6），雖然龍叔叔飲日本ACG奶水大，一直對歐美動漫冇乜feel，不過電影改編自Marvel同名漫畫，由故事背景到設定都幾日本吓，角色算幾討好，冇歐美卡通懶可愛嘅造型設計，加上好耐冇煲3D碟，正好為家中副3D眼鏡解封一下。
《大英雄聯盟》漫畫版本身係五個日本𡃁仔做主角，電影版就改成日本人搭黑人同白人，雖然溝淡咗，不過都有唔少向日本致敬元素，好似片中出現嘅三藩京城（San Fransokyo），就結合咗舊金山同東京特色，街道隨處可見日式建築物同招牌，而天才男主角濱田廣套戰甲，就極有《吹波糖危機》影子，有錢仔費德鍾意笠頭套扮特攝片怪獸，仲有大隻男同溫柔少女，基本上六位成員，就好以平行時空下嘅大雄、技安同靜宜，呢次歐日風格合璧，可算相當成功。
萌爆吹氣公仔 笨頭笨腦
主角醫神（Baymax）係個肥肥白白吹氣公仔，笨頭笨腦膠到離晒譜，惹出全場笑料。劇情預咗老套，又係激勵小朋友做大事橋，幸好故事闡述得幾流暢，醫神軟綿綿又識療傷又可保暖，連龍叔叔都想攬吓佢，最後仲偉大到……小朋友好易眼濕濕離場。要彈嘅係幾位成員太平面，除主角外其餘角色都似大茄，各有技能但又冇乜合作場面，單計動作設計呢part，絕對輸畀Pixar套《The Incredibles》九條街。
要讚嘅係BD聲畫表現相當不俗，過往龍叔叔偏好聽番原裝對白，好少揀粵語配音。唔係懶叻，只係好多碟商一加入中文配音，多多少少損耗配樂及音效質素，都係原汁原味好feel得多。老死彩記帶埋個仔入戲院睇過，話粵語配音超得，一定要試。睇完又幾有驚喜，C AllStar配音有板有眼，好多gag位明顯係自己度出嚟，並非英文版原意，效果又出奇地好。不過轉粵語後音軌只得DTS 5.1，龍叔叔係「聲畫控」，當然要轉英文DTS 7.1翻睇幾幕大戰。重低音力道明顯比粵語版強，速美子嘅磁浮飛碟，掟起嚟有更準確嘅聲音定位，配搭多幕極富速度感嘅3D場面，爽！
Bonus乜都冇，係得一條幾分鐘動畫短片《美味盛宴》，講小狗隨住主人嘅感情生活變化，有唔同嘅食物待遇，無拖拍就萬千寵愛有扒食，識咗女友就得狗糧搭條芫荽，都幾好笑。
I
没有评论:
发表评论