白禮達之亡
世界足球圈最有權勢嘅國際足協主席白禮達喺五月二十九日當選連任，明知美國FBI兵臨城下，猶自牙擦擦，對記者十分擺款，又話美國搞陰謀詭計，似乎要與FBI打一場硬仗。歐洲足協當其時非常不滿，醞釀與白禮達劃清界線，搞分裂。但國際足球涉及太大錢財利益，各方面關係千絲萬縷，UEFA與FIFA離婚，唔係咁易。上一屆巴西世界盃，FIFA袋咗27億美元收益，足夠FIFA（在白禮達控制下）通派明益亞非拉窮國，故此亞非拉各地足協都係白禮達「朋友」。至於UEFA，雖亦得益，但歐洲主要聯賽收益好，歐聯賽事係現金牛，四年一度嘅歐洲國家盃嘅收入僅次於世界盃，是故UEFA着重足球精英主義，亞非拉就攬住足球社會主義。足球係貧富懸殊㗎，譬如英超聯上季收益34億歐元，上升32%，營運利潤達6億1千4百萬英鎊，西班牙甲組聯賽收益19億歐元，意甲收17億歐元，法甲收15億歐元，德甲就收23億歐元，其他國家聯賽嘅球星成名後就往往俾英超、德、西、意、法大國球會挖走，就因為本地球會負擔唔起球星薪酬之故。
白禮達與國際足協執委多年來以為FIFA不受任何一國管轄，收受利益夠猖狂，啲涉嫌委員收到錢就要「洗一洗」，逃逃稅，因美元係世界通行貨幣，始終要經一經紐約美元結算，咁就有機會俾紐約嘅檢察官追查，更有甚者，若有美國人涉及，美國司法部更加振振有詞去干預、調查。一位美國人Chuck Blazer以前係FIFA屬下嘅（CONCACAF）（北美中美及加勒比海足球協會）高層，1997-2013任FIFA執委，自1996年起就收賄款、回佣、禮物，在2013俾FBI在紐約追查，話明如果唔與FBI合作，就會在街頭將佢當街拘捕鎖手扣示眾，呢位比利沙先生嚇到肯認罪，做埋FBI線人，偷錄委員對話紀錄，FBI於是放線釣魚，又碰啱現今司法部長Loretta Lynch係紐約東區檢察官，主理其事，至2015年4月，獲奧巴馬總統聘任為司法部部長，呢位哈佛出身嘅律師一為神功，二為弟子，上任後最佳揚名立萬機會就係高調公開調查FIFA貪污事件，運用部長影響力，叫瑞士警察在FIFA大會前兩日拉人，果然轟動全球，Lynch一炮而紅，白禮達聰明一世，終於栽在一位黑人女子手上，又似乎係上天注定嘅！
Z88
没有评论:
发表评论