不准唱淡 - 左丁山
內地金融市場難以預測，人所共知。滬綜指、深綜指一日升跌2%至3%係等閒事，實在難以事先估計。中國經濟增長率放緩，由保8跌至保7，再跌至今年一直宣傳嘅6.7%-6.5%，完全唔係甚麼國家秘密，況且中國為咗擺脫神秘形象，早已學習西方，定期公佈經濟數據（除咗失業率），各國經濟分析師及證券專家足以掌握大量數字嚟分析評估中國經濟趨勢。
點知道中國至今還是習慣「中央說了算」，中央話一，民間不准話二，你地分析員有政府數據資料呀，只准抄錄，不准分析，中央話經濟向好，就係看好，中央話中國經濟不會硬着陸，就不許亂說硬着陸，索羅斯係謀我之心不死嘅美國大鱷，聲言中國硬着陸無可避免，就由官媒拿出大棒扑死佢！
中央對索羅斯無可奈何，但對內地分析師就唔同，直情喝令國泰君安首席經濟師封口，只准跟隨中央口徑，不可再次睇淡中國。山西省有樣學樣，宣傳大力支持煤礦業，要求媒體讚揚「以股代債」係好事，唔准彈只准讚「以股代債」。
要打入世界先進國家之列，言論自由十分緊要，胡溫過去儘管不時壓制政治評論，外界還可以理解（雖然不贊同），但習李變本加厲，連內地銀行證券界嘅分析員都唔可以暢所欲言，只准唱好，不准唱淡經濟，即是經濟自由化大倒退，極保守思潮抬頭，大大削弱中國在世界上嘅公信力。
其實中國係緊張過龍，美國有索羅斯唱衰中國，便有畢菲特力撐中國無大問題，有「巴士」兄弟沽空中國，便有其他對沖基金站於對立面，金融市場嘅嘢，既有人睇好，便有人睇淡，否則就是單邊市，一係瘋狂上升直至泡沫爆破，一係漩渦式下跌殺盡好友，兩者皆極端，不是常態。常態係有買有賣，勢力均衡。中國領導人顯然在經濟思維方面，還未成熟，過份迷信敵我矛盾，視不同意見人士為敵人，政治上如此，經濟方面亦如是，習近平似乎日漸接近毛澤東思想，以中央指令式統領21世紀中國，令到今天國際投資者不敢向中國下大注係有道理嘅，好似人民幣咁，中國人民銀行一陣大幅提高人民幣兌美元之中間價，一陣又大幅降低，商人/投資者/投機者皆無所適從，大家要買人民幣，內地股票，要諗到好清楚至好！
上一則: 倫敦新市長 - 陶傑
下一則: 成績好，運程自然好 - 林夕
I
没有评论:
发表评论