銅鑼灣書店長挺身爆李波非自願返內地 林榮基：中共逼港人無路可退 我們要向強權說不
【本報訊】銅鑼灣書店店長林榮基失蹤近8個月，日前回港銷案後，昨突現身，開記招首度公開被擄真相。他因帶禁書回內地遭「中央專案組」拘禁，又被迫簽字同意不聘請律師、並在鏡頭面前做戲認罪。林又引述書店股東李波稱，李是在港被跨境擄走，「中國政府已經逼到香港人無路可退」，「一國兩制名存實亡，今次好明顯係跨境執法」。他呼籲港人：「向強權說不，我都可以，你點解唔可以？」
記者：白 琳
銅鑼灣書店5人去年10月下旬起接連失蹤，店長林榮基大前日回港並到警署銷案，昨突然在立法會議員何俊仁陪同下開記招。他稱，去年10月24日在深圳過關時遭押往派出所，再先後在寧波及韶關被監視居住」，其間內地人員逼他簽字答允放棄通知家人及不聘請律師，他稱當時「孤零零一個人，惟有簽紙」。
被擄8個月期間，內地人員一直沒向林表明屬於甚麼部門或團體，但林稱知道對方「唔係國安、唔係派出所、唔係軍人，而係中央專案組」。林強調是根據香港法律經營正經書店，對方卻指林從香港攜帶或郵寄禁書往內地，違反國內憲法，並要求林把寄書紀錄帶回內地。林斥中央政府「𠵱家衰到要我拎（載有寄書資料的）硬件畀佢做呈堂證明」，但他最終堅拒出賣讀者。
■林榮基昨在立法會大樓開記招公開被擄真相，並指若噤聲，他經歷的「將來都會發生喺各位身上」。何家達攝
感激港人為書店5人上街林經歷數十次審問後終於返港，但女友仍遭監視居住。這兩天林翻看港人半年前為書店失蹤5人上街的短片，「完全冇瞓過，我好大感觸，有6,000個香港人上街，我唔識嘅，為咗我哋5個人發聲，我好感激佢哋」。他無法接受李波在港被擄走，故決定開記招交代事件。林昨直言「好對唔住我女朋友」，然而「呢件事唔係我個人嘅事，係香港整個社會人嘅自由訴求……發生喺我嘅嘢可能發生喺各位身上」。
林視香港為家，強調爆料後不打算離港，「（中央）本來要我今日上去，我當然唔敢上去啦，仲上去？」他要求中央政府解釋其所作所為，「你講明一國兩制，公道自在人心」，「如果我作為5個人裏面，負擔最少嘅人都唔出聲，香港就冇得救」。林又呼籲港人向強權說不，「我都可以，你點解唔可以？……呢個係底線，我哋唔可以向強權屈服」。
林昨天開記招前，曾與李波見面，李透露是在違反意願下被帶走，但沒具體說明被何人帶走，「李波係上面派人落嚟捉佢走，呢件事係跨境執法」，李又稱「希望盡快結束件事」。林指現時銅鑼灣書店由「陳先生」續租兩年，但不清楚資金來源，「上面（中央政府）要求佢（李波）辦完公司業務要返上去」。
葉國謙：立會無理據跟進《明報》報道稱，晚上在李波寓所樓下向李求證林榮基的說法。李波保持笑容說「我唔會講任何嘢」。
協助林榮基的何俊仁指，北京政府若不想香港作為國際金融中心崩潰，要立即保證收手，「唔好再做呢啲事」。他又指「如果林榮基喺今日之後突然消失，大家都知點解」。
立會保安事務委員會主席、民建聯立法會議員葉國謙稱，看不到林榮基事件有跨境執法，「只係叫佢提供資料箒，佢喺香港有自由，如果佢畀（內地）人用刀行住條頸，就係跨境執法」。他指林因違反內地法例被拘留，並無牴觸《基本法》，立會未有理據跟進，「我相信市民只係關心有冇境外人員來港執法，𠵱家係冇」。但葉也認為內地人員威迫林讀稿「認罪」相當不智。
下一則: 轟梁振英「唔知救過乜人」
I
没有评论:
发表评论