驚人黑天鵝 - 左丁山
梁振英在12月9日星期五下午三時三十分見傳媒，事先大家都以為他會正式宣佈參選2017年行政長官，誰知爆出一千倍大冷門，梁振英其實係宣佈不再尋求連任，不會參選。
左丁山成日講，2016年怪事特別多，黑天鵝不斷出現，英國脫歐，美國特朗普當選總統，已令人目瞪口呆，本港梁振英在毫無徵兆之下，突然講一聲「因家庭理由」，不會連任，更係年尾最令人震驚嘅消息。早幾日，梁營人馬不斷宣傳衝紅燈犯法，衝紅燈者沒好報，想唔到今次真真正正見紅燈，見紅牌出場嘅竟然就係梁振英，玄學大師話肖馬（午年出生）之人在2017雞年有吉星（天德、福星、祿勳）拱照，運程勝於兔人（犯太歲，無吉星），即梁振英可大勝曾俊華，假如兩人都競選特首嘅話！
現在如何解釋呢？左丁山急急搵另一位師傅問一問，佢話玄學大師依書直說，乙酉雞年肖馬好過肖兔（卯年出生），一啲都冇錯，但如果講番2016猴年丙申年，肖馬之人冇運行，命宮吉星全無，災星就有四粒（天狗、吊客、災煞、陽刃），反而猴年兔人就有紫微（最高統帥）龍德兩大吉星扶持，逢凶化吉，完勝馬人。現在係農曆十一月庚子月啫，雞年要到2017年2月4日立春後才光臨大地。可能就在猴年子月，子午相沖之時，梁振英剛好冇運行呢。
一位電器零售批發界選委五年前請吃春茗之時，已同左丁山講，梁振英有官運，好過唐英年，好可能當特首，但當選後，會用盡元神，累及香港。現在諗番呢位選委真係靈過鬼，假如明年佢又請吃春茗，一定要霸位坐在佢旁邊。
講番正經分析，全城無人相信梁振英嘅「家庭理由」，雖則蘋果日報影到佢到威爾斯親王醫院探女（聽聞十月已經入院），梁齊昕不知患了甚麼病，最有可能嘅就係中央決策決定放棄佢（成報早有料到？），於是梁振英思前想後，不敢再次衝紅燈，知難而退。本欄之前講過林鄭係Plan B，CY有乜依郁，就由佢頂上，現在大有可能啦，葉劉會在12月15日宣佈參選（曾鈺成如是說），唔通林鄭會眼光光睇住葉劉嘻嘻笑？吾不信也。曾俊華又如何呢？可以講，黃金機會到了，不妨立即宣佈參選，主動出擊，以免輸在慢閘。最失望嘅一定係擁梁派，明年七月會有好多人打回原形，而一直擁佢嘅大富豪、擁梁派，又不知如何轉軚咯！
上一則: 政治正確Quota - 陶傑
下一則: 大罪人 - 林夕
Z88
没有评论:
发表评论