葉劉未起機，先扯火 - 馮睎乾
小小記者問一條簡單問題，竟惹起葉劉淑儀大大官威，單此一事，已知她難當重任，即使強行入閘，終究被麒麟撞飛，致玻璃心碎，葡萄肉裂。查實問咩令葉劉爆晒seed呢？原來問她假如當選，會否在任內為第二十三條立法。葉劉不敢明言，反質疑記者「trap」她：「網上好多人抹黑我，叫我做咩『女版689』、『666加23』，我希望各位公平啲、理性啲啦！我哋係文明社會，點解要用呢啲手段抹黑我呢？我希望你再諗吓點樣問啦。」
真好笑，十三年前葉劉硬推二十三條，一炮成灰，今日選特首，記者這條問題行貨之極，你事先不做功課，準備體面答案，反而掉轉頭鬧人trap你？要答又有幾難？我不妨代入葉劉身份，隨口度句台詞給大家看看：「特首有憲制責任為第二十三條立法，但香港市民似乎疑慮未消，所以幾時立法應該由民意決定，如果我當選嘅話，一定會緊記過去教訓，盡力令市民對國家恢復信心，我認為我可以喺任期內做到呢點。」這是非常官腔的答覆，有兩種解讀方式：一是暗示任期內立法，二是說任期內將令市民信任國家，點講都通，即使明知是假，至少也不怕得罪人。
我現在理性、公平地講一句：葉劉你做了幾十年官，近十年議員，居然連基本應對能力也欠奉，一條例牌菜問題也要爆seed，請問如何符合中央對特首的三項要求呢──即中央信任、港人支持、具管治能力？很多天真的人以為，葉劉喜怒形於顏色，夠真，沒梁振英那麼可怕。傻豬豬，呢啲唔係叫真，係叫有恃無恐，同嗰位「官到無求膽自大」嘅「妹妹」天生一對。聽其言，觀其行，今日訓斥記者的「女版689」，跟十三年前罵涂謹申「唔守規矩，又冇禮貌」、說「唔會再答佢問題」的掃把頭有分別嗎？我哋係文明社會，希望葉劉再諗吓點樣答啦。
上一則: 樂古道一號 - 蔣芸
下一則: 香港欠她的嗎？ - 高慧然
Z88
没有评论:
发表评论