【短片】【尋找軒仔的蹤影】張敬軒完全消失《歌手2017》 全靠紅頭先見到少少
2017-01-22 09:33:00 HKT
軒仔呢個紅頭好易認，但cut得就cut，得少少位見到佢（箭咀示）。
左下角呢個紅頭就係軒仔
杜麗莎返嚟，有影到軒仔（右下角）。
放大睇！
公佈賽果，杜麗莎右手邊就係軒仔！
紅色衫呢位。
明明應該企喺杜麗莎身後，成個人唔見咗，係咪用電腦執走咗成個人？
剪走咗，夾硬嚟。
睇番叱咤，軒仔係紅頭！
幫《歌手》宣傳，都係紅頭。
宣佈退出之後，俾《蘋果》見到佢食飯，都係紅頭！
有人喺微博留言話見到軒仔
仲力撐軒仔，話節目只係想炒作。
張敬軒之前錄影咗湖南衛視《歌手2017》(前名我是歌手)第一集，但後來慘被退出比賽，咁英皇最後就話外間有很多唔同嘅聲音，話無論評論係咪正確中肯，都令到歌手造成壓力，搞到歌手無法專心比賽喎！咁英皇就話經過同電視台最後商討後，雙方共同決定終止呢次嘅合作。(新聞連結：http://bit.ly/2kaboYO
)
咁軒仔之前點都叫錄影咗第一集，電視台又會點樣處置軒仔呢？唔通真係將軒仔打馬賽克？
噚晚《歌手》播出第一集，亦即是話所有疑團都會解開。播放比賽前，湖南衛視就製作咗約25分鐘暖場節目《我們的歌手》，介紹今次參加比賽嘅歌手，喺節目入面，已經完全冇軒仔嘅蹤影，咁呢方面就冇乜難度嘅，因為就算之前訪問晒軒仔，只要一刀砌咁剪晒軒仔嘅訪問片段，節目依然睇落好完整。
10點30分，比賽正式開始，就有八位「音樂合伙人」出場，介紹吓節目咁啦，理應八位合伙人就係八位參賽歌手嘅拍檔，佢哋會陪伴參賽歌手作賽，直至被淘汰為止。原先被安排喺第四出場嘅軒仔，當然冇咗影啦，咁歌手出場嘅次序就變咗迪瑪希、袁婭維、光良、杜麗莎、蕭敬騰嘅獅子合唱團、譚晶、林憶蓮。
但無論劇組點努力，點都會發現軒仔嘅蹤影，好似杜麗莎演唱完後，返回歌手嘅大房時，就會發現到紅頭髮嘅軒仔欲走向杜麗莎方向，相信係祝賀杜麗莎演出成功咁啦！除咗呢個大側面，你仲會喺節目唔少鏡頭，發現頭一小撮軒仔嘅紅頭、膊頭同拍手蹤影。
咁到最後公佈結果時，依照過往節目嘅慣例，會安排晒所有歌手坐於台前，聽取排名，今次佢哋安排歌手依出場次序而坐，即係話軒仔理應坐於光良與杜麗莎嘅中間，當宣佈杜麗莎同迪瑪希奪得歌手互投第一名時，迪瑪希就走向杜麗莎握手時，鏡頭只見到光良及身後嘅合伙人，而光良同杜麗莎中間，好明顯出現咗一大個空隙，相信係電視台利用CG特技，執走咗軒仔，軒仔就係咁，消失咗係螢光幕喇！認真慘慘豬。
雖然電視台用盡方法令到軒仔消失於節目，但發生過就係發生過，歷史唔會因為你做咗手腳而改寫，好多網民依然記得軒仔曾經係參賽歌手，所以節目嘅官方微博，出PO問大家投票邊個表現最好時，你唔難搵到軒仔嘅名字，好似有人只留言打咗三個字，就咁話「張敬軒」，亦有人話呢個節目本質變晒，鬧《歌手》搵軒仔嚟只係想炒作等等。當中有唔少人都有留意到剪接呢個問題，仲擺埋見到軒仔嗰幾個鏡頭上網。
I
没有评论:
发表评论