退休讀史
一位讀者X來信講，退休之後，身處混亂世道，鬱悶難解，打算寄情於山水與書本中，打算考慮報讀以下課程，兩者選一：（甲）MA in Chinese Historical Studies（港大）；（乙）MA in Comparative and Public History（中大）。
此外，「政府有沒有給五十多歲退休人士的讀書補貼？」左丁山只識其一，不識其二，退休人士攻讀大學嘅「自負盈虧課程」，係冇UGC撥款津貼嘅，大學一定要收足成本，學生亦冇政府補貼，學費全部由自己俾。
至於讀中大還是港大嘅歷史課程碩士，左丁山對上述之港大課程甚為陌生，不敢置評，要左丁山俾意見咯喎，只能咁講，有不少朋友讀完或讀緊中大之比較歷史碩士，大編輯就係一位，啱啱完成第一年課程，佢就讚不絕口；新亞校友吳明林係該碩士課程第一批畢業生，佢攞完學位就周圍推介，叫朋友去讀，今個月正式退休嘅助理廣播處長施永遠就立即跟隨呢位吳前輩，走咗去報名，希望得到中大取錄（按：每年有幾百人報名。要面試）。房屋委員會委員黃遠輝係城規會副主席，以前係大賓架，自銀行退休後就攻讀呢個課程，好似係2014年畢業嘅。
請讀者X自己做多啲資料搜集，自行選擇港大或中大嘅歷史碩士課程。近五年來，聽到不少退休人士半退休人士要攻讀碩士（MA），當然並非為了鑽研學術，要認真做研究，就要報讀哲學碩士（M.Phil）課程，但一定唔夠年青畢業生爭嘅，「哲學碩士」係英國式稱謂，在香港係由UGC撥款支持嘅，大學畢業時攞唔到二級榮譽根本就難以報讀。讀MA就輕鬆得多，可以攤長兼職嚟讀，畢業時唔駛交比較深入嘅研究型論文。香港人可能花了大半生求財，為供樓、為子女讀書入學，勞碌咗三十年，退休時已經供完樓，兒女亦已大學畢業，成身鬆晒，於是又想讀吓書，與銅臭絕緣，喜歡報讀文史哲藝術嘅碩士課程。據大學中人講，又以中國歷史、香港歷史、藝術史、佛學呢幾門最受歡迎，係大學嘅「賺錢」科目，好多理科生出身嘅專業人士在中學未修讀中國歷史或人文科目，退休後反而對人文歷史科最有興趣。可憐兼可惜嘅係，今天十幾歲嘅中學生，對選讀中國歷史就耍手夾擰頭，令中史老師有失業之虞，大學歷史本科生，恐怕會快成為稀有品種。
I
